Senat kýlýarynda jýrnalıserdiń dárigerge tikeleı júginý úshin ne isteý keregine qatysty suraǵyna vıse-mınıstr Tımýr Sultanǵazıev jaýap berdi. 

- Ár emhananyń onlaın jazylýǵa bolatyn óz júıesi, aqparattyq qosymshalary, ártúrli medısınalyq aqparattyq júıeleri bar. Sol júıelermen tirkeý bólimi arqyly jazylýǵa bolady. Keı uıymdar áli kúnge deıin adamdardyń kelýi boıynsha kezekpen júredi. Iaǵnı, ár emhananyń belgili bir mamanǵa jazylý mehanızmi bar, – dedi Tımýr Sultanǵazıev.

Onyń aıtýynsha, ınovasıa naýqastardyń toptasyp kelýin, kezek týyndaýdyń aldyn alady. Óıtkeni azamattar naqty qajeti boıynsha ǵana tikeleı júginedi.

- Mysaly, tis aýyrsa, tis dárigerine barý úshin jalpy tájirıbe dárigerine nemese dárigerge baryp joldama alýdyń qajeti bolmaıdy. Siz tis dárigerine tikeleı bara alasyz. Nemese mysaly, eger jaraqattanyp qalsa, medısınalyq kómek alý úshin dereý travmatologqa barýǵa bolady. Iaǵnı mundaı obektıvti jaǵdaılarda ǵana jalpy tájirıbelik dárigerdiń joldamasynsyz beıindi mamanǵa barýǵa ruqsat etiledi, – dep tolyqtyrdy mınıstrdiń orynbasary.

Buryn norma tómendegi bólikterdi qamtyǵan:

• shuǵyl jaǵdaılar men jaraqattar, onyń ishinde oftalmologıalyq, otorınolarıngologıalyq syrqat;
• shuǵyl jáne josparly stomatologıalyq kómek kórsetý;
• dermatovenerologıalyq sıpattaǵy aýrýlar;
• tirkelgen jeri boıynsha akýsher-gınekolog pen psıhologtyń qabyldaýy;
• onkolog jáne onkogematologtiń qabyldaýy;
• dıspanserlik esepte turǵandar úshin-kardıolog, endokrınolog, oftalmolog, nevropatolog, hırýrg qabyldaýlary;
• beıindi mamannyń aıtýy boıynsha ony qaıta qabyldaý;
• jastardyń densaýlyq saqtaý ortalyqtarynda mamandar qabyldaý;
• jyljymaly medısınalyq keshenderdiń jáne basqa da mobıldi qyzmetter.