Depýtattyń aıtýynsha, búginde kez kelgen adam, onyń ishinde mektep oqýshylary nasybaıdy erkin satyp ala alady.

   "Ókinishke qaraı, buryn ony tek eresek urpaq qoldansa, qazir jastar, tipti qyzdar da oǵan táýeldi. Olardyń sany jyl saıyn artyp keledi. Onyń ústine bul jaǵymsyz ádet tipti sportshylar arasynda da qalypty jaǵdaıǵa aınalǵanyn qalaı túsinýge bolady?", – dedi depýtat Amantaı Jarqynbek.

   Sonymen qatar májilismen bul ónimniń quramy kúmándi ekenin aıtyp, ony paıdalaný densaýlyqqa aıtarlyqtaı zıan keltiretinin eskertti.  

   - Shved ǵalymdary zertteý júrgizip, nasybaıdyń quramynda hrom, nıkel, kadmıı, qorǵasyn, myshák sıaqty hımıalyq zattar bar ekenin anyqtady. Dárigerler nasybaıdyń táýeldilik týǵyzyp qana qoımaı, túrli aýrýlardy týdyratynyn atap ótti. Nasybaıdy tutyný adam aǵzasyn qaterli isikke, bedeýlikke ákeletini ǵylymı turǵydan dáleldengen. Qazaq onkologıa jáne radıologıa ǵylymı-zertteý ınstıtýty mamandarynyń aıtýynsha, nasybaı tartý aýyz qýysynyń qaterli isiginiń damýyna ákelip soǵady. Olar keıingi kezderi nasybaıdy tutynýdyń saldarynan jastardyń qaterli isik aýrýyyna shaldyǵatynyn atap ótti, – dedi depýtat.

   Amantaı Jarqynbek "eldi ýlap jatqan bul indetti aýyzdyqtap, onyń taralýyn túbegeıli toqtatý qajet" dep esepteıdi.

   - Elimizde zańmen shekteý qoıylǵanymen, ony júzege asyrýda álsizdik tanytyp otyrmyz. Sondyqtan ult densaýlyǵyna nuqsan keltiretin, urpaǵymyzdy ýlap jatqan qazaq halqyna jat ádetten arylýymyz kerek. Arnaıy organdar óskeleń urpaqty ýlap jatqan saýda núktelerine qatysty sheshim qabyldap, keshendi sharalar qabyldaýy kerek", – dedi Amantaı Jarqynbek.