Til janashyry Tolqyn Muhtarhanova qazaq tiliniń quqyǵyn shektegen “Miele” JSHS jáne “Mechta” kompanıalaryn azamattyq sotta jeńip shyqqan. Daýly oqıǵanyń qalaı bolǵanyn Air Astana kompanıasynyń burynǵy qyzmetkeri Dalanews.kz agenttiginiń tilshisine egjeı-tegjeıli baıandap berdi. Onyń aıtýyna, til janashyry qoǵamdyq ómirde qazaq tiline qatysty kóptegen kedergige tap bolǵanyn kóre júrip, tilge qatysty zańdarmen tolyq tanysyp shyqqan.

“Otbasymyzben jańa qonys aldyq. Sol jerge óńdeý jumystaryn jasaýǵa bel baıladyq. Osylaısha jazda aldyn ala “Mechta” dúkenine baryp, “Miele” kompanıasynyń kir jýǵysh mashınasy men keptiretin qurylǵysyn satyp aldyq. Páterimizdiń óńdeý jumysy aıaqtalǵan soń, kúzde jańa qonysymyzǵa kóship keldik. Zattarymyzdy “Miele” kompanıasynan aldyrttyq. Sodan kópbalaly bolǵan soń, birinshi qajet nárse kir mashına boldy. Sony ornatyp, qoldana bastadyq. Alaıda men nusqaýlyqtan qazaqsha mátin taba almadym. Alǵan zattarymyzda qazaqsha nusqaýlyǵy múldem bolmady. Sodan men “Miele” kompanıasyna habarlasyp, olardan qazaqsha nusqaýlyqty suradym. Olar jiberý úshin ýaqyt qajet ekenin aıtty. Sodan men óz talabymdy sot arqyly sheshetinimdi jetkizdim”, – deıdi Tolqyn Muhtarhanova.

Al kompanıa qazaqsha nusqaýlyǵyn eki apta ótkennen keıin jibergen.

- “Miele” bir aı nemese eki apta buryn ashylǵan kompanıa emes. Qazaqstanda 15 jyldan beri jumys istep keledi. Eger olarda qazaqsha nusqaýlyq bolsa, sol mezette elektrondy poshtama joldaıtyn edi. Biraq olar eki apta ótkennen keıin iske kirisip, elektrondy nusqasyn poshtama jiberdi. Nátıjesinde “Miele men “Mechta” kompanıalaryn “tutynýshy quqyǵym buzyldy dep” azamattyq sotqa berdim. Birinshiden, tutynýshy retinde suraǵan nusqaýlyq pen “Miele”  kompanıasynda qazaqsha aqparattyń joq ekenin aıttym. Sonymen qatar “Miele” kompanıasynyń saıtynda qazaq tilin tańdaıtyn batyrmanyń joq ekenin de atap óttim. Sot prosesinde olar “kz” degen qazaqsha batyrmany engizdi.Alaıda batyrmany qosqanymen, qazaqsha aqparat bolmady. Osy negizde tutynýshy retinde quqyǵymnyń buzylǵanyn qostym”, – deıdi til janashyry.

Nátıjesinde ol “Miele” kompanıasyn sotta jeńip shyǵady. Al tutynýshy quqyǵyn shektegen kompanıa oǵan arnaıy ótemaqy tólegen.