Májilismen baılanys qyzmeti tarıfiniń kúnnen kúnge qymbattaýy halyqtyń qaltasyn qaǵyp, tynysyn taryltyp bara jatqanyn aıtty.

“Tarıfter jyl sanap emes, aı sanap ósýde. Máselen, Básekelestikti qorǵaý jáne damytý agenttiginiń málimetinshe, uıaly baılanys qyzmetteriniń tarıftik jospary 2023 jyly 57%-ke deıin ósken. Al 2021-2022 jyldary tarıfterdiń ósýi ortasha alǵanda 13-ten 37% deıin bolǵan. Atap aıtsaq, 2023 jyldyń sáýirinde Bılaın «Iarkıı» tarıftik josparyn 1790 teńgeden 2490 teńgege deıin (ósim – 39%) qymbattatty, Ksell men Tele2 tamyz aıynan bastap ártúrli tarıftik josparynyń ósetinin málimdegen. Atap aıtqanda, «Realnyı bezlımıt» (Ksell) 3390 teńgeden 4390 teńgege (ósýi 29 %), «Prosto sýper» (tele2) 2590 teńgeden 3290 teńgege (ósýi 27 %) ósti”, – dedi Beısenbaev.

Depýtat Aktıv, Ksell operatorlary tarıfke 1 myń teńge, al arnaıy áleýmettik jelilerdegi ınternetti lımıtsiz qoldaný úshin ústinen taǵy 990 teńge qosyp otyrǵanyn aıtty. Sonda bar-joǵy 3390 teńgelik tarıf 5380 teńgege deıin, ıaǵnı 59% qymbattaǵan.

Oǵan qosa depýtat baılanystyń baǵasy qymbat bolsa da, sapasy syn kótermeıtinin atap ótti.

“Baılanys óte álsiz jáne ınternet jyldamdyǵy tym baıaý. Speedtest jahandyq reıtıńi boıynsha mobıldi ınternet jyldamdyǵy boıynsha Qazaqstan 142 eldiń arasynda 67 orynda tur. Sonymen qatar, elimizde áli de ınternet jetpegen aýyldar bar. Máselen, 2023 jylǵy 1 qańtardaǵy jaǵdaı boıynsha, 6 290 aýyl bolsa, sonyń shamamen 1,5 myń aýylynda mobıldi ınternet múldem joq. Al 902 aýylda tek bir ǵana mobıldi operator bar. Demek, tutynýshyda eshqandaı tańdaý joq. Sodan keıin «qazanshynyń erki bar, qaıdan qulaq shyǵarsa» degendeı, operatorlar ózi qalaǵan baǵany qoımaı qaıtsin”, – dep naqtylady depýtat.