Áleýetti menshik ıelerine qoıylatyn topyraq sapasyn, ósimdik jamylǵysyn saqtaý, jaıylymdardyń tozýyn boldyrmaý, aýyspaly egisterdi saqtaý jáne jerdi utymdy paıdalaný tıimdiligin arttyrý boıynsha basqa da qarsy mindettemeler qoldanystaǵy konkýrstardaǵy talaptarda kúsheıtiletin bolady.

Mundaı tapsyrmany 2024 jylǵy 3 sáýirde ótken paıdalanylmaı jatqan jáne zańnamany buza otyryp berilgen jerlerdi alyp qoıý máseleleri jónindegi komısıanyń kezekti otyrysynyń qorytyndysynda Premer-Mınıstrdiń orynbasary Serik Jumanǵarın berdi. 

Jer resýrstaryn basqarý komıtetiniń tóraǵasy Murat Temirjanovtyń aıtýynsha, 2024 jyldyń basynan beri aýyl sharýashylyǵy maqsatyndaǵy 391,2 myń gektar, al 2022-2024 jyldary barlyǵy 10,4 mln gektar jer memleket menshigine qaıtarylǵan. Onyń 3,7 mln ​​ga jeri jergilikti halyqqa qaıta bólindi (jalpy maqsattaǵy mal jaıýǵa – 1,72 mln ga, konkýrstyq negizde bólip paıdalanýǵa – 1,69 mln ga).

«Aıta ketý kerek, aýyl sharýashylyǵy jerleriniń 4,4 mln ga nemese 2022 jyldan bastap el boıynsha qaıtarylǵan barlyq jerdiń 44%-y buryn 204 iri kásipkerlik sýbektileriniń qolynda bolǵan», — dep habarlady Murat Temirjanov.