Bir sóılemdi jazbam uzaq talqylandy. Jeke ketip qalyp ta sol sózimdi julmalap jatqandar boldy. 
Fılosofıa bylaı túsindiredi: Ulttyq ıdeıa – halyqtyń, etnostyń nemese ulttyń ómirlik máni. Qazaq – ult deńgeıine kóterilip, memleket qura alǵan baqytty etnostardyń biri. Halyqaralyq qatynastarda ULT degen termın –MEMLEKET sózimen sınonım. 
Al qazaqtyń ómirlik máni ne edi? Bizdiń ulttyq ıdeıamyz – BİRLİK. Rýlardyń basyn qosý ıdeıasynan bastap, keıinnen úsh júzdiń birligin tý etkenbiz. Sosyn ALASH ıaǵnı qazaqtardyń bas biriktirgenin qaladyq. Taǵdyrly jyldary kópetnosty memleketke aınalǵaly beri biz QAZAQSTAN-nyń birligin negizgi ıdeıa etip kelemiz. Ulttyq (Memlekettik) ıdeıamyz – tatýlyq pen birlik. «Máńgilik El» ıdeıasynyń negizi de osylaı túzildi. Ony jaqtyrmaıyq, keleke eteıik, biraq báribir tynyshtyqtyń nezigi osy ıdeıa bop keledi. 
Ulttyq ıdeıa kózge kórinetin matematıkadaǵy naqty sandar nemese tarıhı qujattar emes. Ol – Ultty (memleket halqyn) biriktiretin kishkentaı faktorlardyń jıyntyǵy. Ol mádenıettegi, sporttaǵy, halyqaralyq qatynastardaǵy úlken jetistikter bolýy múmkin nemese Qaraǵandy, Qyzylaǵash jerin shaıyp ketken sý tasqyny sıaqty tabıǵı apattar bolýy da múmkin. 
Birliktiń ınersıasy da myqty bolady. Áıtpese, 2012 jylǵydaı bizdi Olımpıada eshýaqytta esten tandyra biriktire alǵan joq edi. Áli kúnge deıin umytpaımyz. Keshegi kezdesýdi bir sáttik emosıa ǵoı mensinbegender de boldy. Naqty aıtaıyn, Gennadıı qazaqty biriktirip turǵan joq. Birlikti arttyratyn kishkentaı faktorlardyń bir bólshegi ǵana. Biz Genanyń gúrzi judyryǵyndaı bolyp jumylǵan qoǵamdy kórdik. Qazaqtyń týy, shapany, el deńgeıinde brendke aınalǵan saýda belgileri bári-bári bir ǵana azamattyń arqasynda kópke tanyldy. Shapan ilingen Genanyń kıiný bólmesine AQSH Prezıdenttigine kandıdat D. Tramptyń ózi sálem berip kirip shyqty. 
Keıbireýler dombyra ustap kıiz úıde otyrmaǵan soń qaıdaǵy ulttyq ıdeıa deıdi. Árıne árqaısyńyzdyń pikirińizdi syılaımyn. Menimen kelisýge tipti de mindetti emessizder. Golovkınniń aty shyqqan saıyn Qanatty umyttyq dep jylaýdy da qoımaı kelemiz. Qazaq barda Qanat umytylýshy ma edi? Ekeýin bir birine qarsy qoıǵymyz kelip, biz ULTTYQ IDEIA dep otyrǵan birligimizge nuqsan keltirip júrgen de ózimiz.

Jarqyn Túsipbekuly, Facebook paraqshasynan alyndy