Energetıka mınıstrliginiń basshysy áleýmettik jelide AES salýǵa qatysty referendým ótkizýdiń qajeti joq degen jalǵan aqparat taralyp jatqanyn málimdedi. 

Energetıka mınıstri Almasadam Sátqalıev Qazaqstanda atom elektr stansıasynyń qurylysy boıynsha respýblıkalyq referendým ótkizý máselesine túsinikteme berdi.

Úkimet kýlýarlarynda Energetıka mınıstrliginiń basshysy  buqaralyq aqparat quraldarynda "mınıstr referendým ótkizý qajeti joq dep aıtty" delingen materıaldardyń jalǵan ekenin aıtty.

"Bul durys emes aqparat. Meniń oıymsha, bul basylym resmı túrde keshirim suraýy kerek. Sebebi men osylaı aıttym: "zańnamaǵa sáıkes qajet emes". Biraq halyqtyń erik-jigeri bolǵanyna súıene otyryp, Memleket basshysynyń tikeleı tapsyrmasy bar, sheshim qabyldandy, biz referendým ótkizýmen aınalysatyn bolamyz. Bul turaqty siltemeler jýrnaldyń redaksıasy men jýrnal ıeleriniń tıisti reaksıasyn talap etedi. Olar maǵan keshirim surap, túzetý aqparatyn berýi kerek dep sanaımyn", – dedi Almasadam Sátqalıev.

Alaıda, ol qaı BAQ durys emes aqparat taratqanyn naqty kórsetpedi.

Jýrnalıser Energetıka mınıstrligi basshysynyń qazaqstandyqtardan keshirim suraýy kerek pe dep surady. Óıtkeni ol da, vedomstvo da stansıanyń qurylysy týraly naqty málimet bermeıdi.

"Munda prosedýralar bar. Jurtshylyqpen tikeleı baılanys bar. Biz óńirlerge baramyz, is júzinde barlyq óńirlerde keń aýqymdy túsindirý naýqanyn júrgizemiz, barlyq aǵymdaǵy suraqtarǵa jaýap beremiz. Mınıstrlikke referendýmdy jedeldetý týraly birde-bir ótinish qoǵamdyq birlestikterden de, qoǵam qaıratkerlerinen de bolǵan joq. Sondyqtan biz zańnamaǵa jáne qoldanystaǵy rásimderge sáıkes jumys isteımiz", - dep túsindirdi Almasadam Sátqalıev.

Onyń aıtýynsha, mınıstrlik qyzmetkerleri tek tórt óńirge barǵan, alaıda túsindirý jumystaryn barlyǵynda júrgizý qajet.

Buǵan deıin TASS agenttigine bergen suhbatynda Qazaqstannyń Reseıdegi elshisi Dáýren Abaev atom elektr stansıasyn salý týraly referendým osy jyldyń sońynda ótýi múmkin ekenin málimdedi. Onyń aıtýynsha, reseılik "Rosatom" korporasıasy stansıa qurylysynyń áleýetti merdigerleriniń qatarynda.