Ǵalymjan JYLGELDIEV, Eldos Smetovtiń jeke bapkeri: Smetov sporttan ketpeýi kerek

/image/2024/08/02/crop-25_12_436x775_img_3847.jpeg

Fransıa astanasy Parıjde jýrnalıs Aslan Qajenovke suhbat bergen Eldos Smetovtiń jeke bapkeri Ǵalymjan Jylgeldıev shákirtiniń Olımpıada aldyndaǵy qıyndyqtary týraly aıtyp, aldaǵy josparlarymen bólisti.

- Eldosty 2012 jylǵy Olımpıada oıyndaryna daıyndadyq. Odan keıin 2016 jylǵy Rıo, 2021 jylǵy Tokıo dodasyna qostyq. Osylaı aqyryndap maqsatqa jettik. Kishkentaıynan yzaqor bolatyn. Sonysyn bilip, ádeıi yzalandyratynmyn. Yzaqorlyǵy Eldostyń minezin qaırady, - dep Ǵalymjan Jylgeldıev ekeýiniń ara-qatynasy áke men baladaı ekenin de aıtty.

- Bala «ákem ne deıdi eken» dep aýzyna qarap otyrady ǵoı. Eldosty balamdaı kórem. Kerek kezde maqtaımyn, qajet kezde urysyp ta alamyn. Súıekten ótkizip aıtatyn ýaqytym da bolady. Qaljyńdasyp ta júremiz. Keıingi ýaqytta «Eldos, seniń ózińniń bes balań bar, saǵan qashanǵy ursa beremin» dep qaljyńdasatyn boldym.

Olımpıada oıyndarynyń aldynda Smetov Abý-Dabıde ótken álem chempıonatyna qatysyp, 5-oryn alyp qaldy. Sol sátsizdikten keıin jankúıerlerdiń ǵana emes, mamandar arasynda da úlken daý bolyp, Olımpıada oıyndarynda Qazaqstannyń namysyn kim qorǵaıdy degen másele kóterildi. Nátıjesinde Almatyda basty úmitker úsh dzúdoshy: Eldos Smetov, Nurqanat Serikbaev jáne Maǵjan Shamshadın arasynda qosymsha mını-týrnır básekesi ótti.

- Úsh úmitkerdi kúrestirý týraly áńgime shyqqanda Eldos bulqan-talqan boldy. Men de ashýlandym. Ekeýmiz de demalysta bolatynbyz. Aqyry sabyrǵa kelip, Eldosqa kúresesiń dedim. Olar da jaý emes. Eldostyń óziniń inileri. Birshama jas dzúdoshylar. «Bireýin ońǵa tasta, ekinshisin solǵa laqtyr» dedim.

Sol jekpe-jekterde Eldos ekeýin de jeńip, Qazaqstan atynan Olımpıada oıyndaryna qatysýǵa múmkindik aldy. Degenmen, daıyndyq barysynda kedergiler az bolǵan joq.

- Eki jyl buryn Qazaqstanǵan Fransıadan mamandar kelip, ulttyq quramaǵa keńesshi-bapker retinde bizdiń dzúdoshylardy jattyqtyra bastady. Basynda men de kórsin dedim. Biraq baǵdarlamasy ózime unaǵan joq. Bizdi jaqyndatpady. Sodan Eldostyń ózi «maǵan bul baǵdarlama unap turǵan joq, sizben daıyndalam» dep tótesinen aıtty. Alaıda shákirtimniń qasynda júrýime kóp adamdar qarsy boldy. Janyna jolatpaýǵa tyrysty. Sol kezde tóraǵa Erbol Myrzabosynov (QR Sport jáne týrızm mınıstrligi Sport komıtetiniń tóraǵasy – avtor) kómektesti. «Ǵalymjan, sizge ne kerek? Qandaı jaǵdaı kerek? Ózińizge senemiz» dep maǵan Eldosty jeke shyǵaryp berdi. Jattyǵýymyzǵa barlyq jaǵdaıdy jasady. Tipti, Olımpıadanyń ózinde jarys ótip jatqan zalǵa kirip-shyǵýymyzǵa deıin kómektesti, - dedi Eldostyń jeke bapkeri.

Ǵalymjan Jylgeldıevtiń pikirinshe, Smetov Olımpıadadan keıin de sporttan ketpeýi qajet. Olımpıada chempıonyn tárbıelegen maman áli de Eldosty el sportyna bereri mol dzúdoshy dep esepteıdi.

- Eldosqa qarap, ózge jastar úlgi alyp, aldaǵy úlken dodalarda zor tájirıbe jınaıdy. Ulttyq quramada júrip-aq, Smetov basqa izbasarlaryn sońynan erte alady – dedi Jylgeldıev.

Ǵalymjan JYLGELDIEV, Eldos Smetovtiń jeke bapkeri: Smetov sporttan ketpeýi kerek

Qatysty tegter :

Pikir qaldyrý

Qatysty Maqalalar