Májilis depýtattary bilim jáne mádenıet máseleleri jónindegi zań jobasyna túzetýler ázirledi.

Bul túzetýlerde halyqaralyq ǵylymı jobalar baıqaýynyń júldegerlerine birjolǵy tólem berý, joǵary oqý oryndarynyń keıbir túlekterin grant óteýden bosatý jáne keıbireýleri úshin grantty óteýdi keıinge qaldyrý sekildi máseleler qarastyrylǵan. Jańa zańnamalyq normalar týraly qujatty ázirleýshilerdiń biri, depýtat Asqat Aımaǵambetov baıandady

Qazaqstanda memleket esebinen joǵary bilim alǵandar mindetti túrde grantty óteıtini týraly norma bar. Osy zań jobasyn ázirleý kezinde depýtattar qazaqstandyqtardyń ótinishin eskerip, ata-ana atanǵan nemese múgedektigi bar balalardy tárbıelep otyrǵan joǵary oqý oryndarynyń túlekterine kómektesip, olardy oqý bitirgennen keıin grantty mindetti túrde óteýden bosatýdy usynǵan.

Asqat Aımaǵambetovtiń aıtýynsha, Ǵylym jáne joǵary bilim mınıstrligi bul normany qoldaǵan. "Bizde múgedektigi bar balalardy tárbıelep otyrǵan túlekter az emes. Adamnyń jaǵdaıy basqasha ekeni túsinikti. Sondyqtan memleket mundaı adamdarǵa jaǵdaı jasaýy kerek sıaqty. Biz bastama kóterdik, Úkimet bul bastamany qoldady. Endi memlekettik grant boıynsha oqyǵan túlektiń múgedektigi bar balasy bolsa, biz oǵan grantty ótemeýge múmkindik beremiz, ol grantty óteýden bosatylady", - dedi Aımaǵambetov.

I toptaǵy múgedektigi bar adamdarǵa kútim jasaıtyn qazaqstandyqtardy da grantty óteýden bosatý usynylyp otyr. Sondaı-aq, depýtat sheteldik joǵary oqý oryndaryna rezıdentýraǵa, magıstratýraǵa, aspırantýraǵa, doktorantýraǵa oqýǵa túskenderdiń jáne oqýyn aıaqtaǵandardyń grantty óteý boıynsha merzimin keıinge qaldyrýdy usyndy. "Bakalavrıatta oqyp, keıin shetelge magıstratýraǵa túskender sanatyn qosýdy da usyndyq, keıinge qaldyrýǵa múmkindik bereıik. Eger ol magıstratýrada eki jyl oqysa, grantty óteý merzimin osy 2 jylǵa keıinge qaldyramyz", - dep túsindirdi depýtat.

Byltyr Prezıdent Qasym-Jomart Toqaev Qazaqstandaǵy daryndy balalardy qoldaýǵa jáne olardy damytýǵa shaqyrdy. Májilis depýtattary daryndy balalardy qoldaý úshin halyqaralyq ǵylymı joba baıqaýlarynyń jeńimpazdaryna birjolǵy tólem engizýdi usyndy.

- Baıqaýlardyń jeńimpazdary úshin eń joǵary tólem mólsheri - shamamen 6 mıllıon teńge. Sonymen qatar, olardy daıyndaǵan muǵalimderdi de yntalandyrý usynylady. "Sportta olımpıada jeńimpazdaryna shamamen 250 myń dollar beredi. Halyqaralyq ǵylymı jobalar men pándik olımpıadalardyń jeńimpazdary Qazaqstan úshin de mańyzdy ekenine senimdimiz. Bul - biz buryn qabyldaǵan normanyń logıkalyq jalǵasy. Byltyr mynadaı zań qabyldadyq: halyqaralyq ǵylymı jobalarda joǵary nátıjelerge qol jetkizgen oqýshylar joǵary oqý ornyna UBT tapsyrmaı-aq grantqa túsýge jáne "Bolashaq" stıpendıasyna úmitker bolýǵa múmkindik aldy. Búgin aıtylyp otyrǵan norma - sońǵy qadam", - dedi Asqat Aımaǵambetov.