Energetıka mınıstri Almasadam Sátqalıev tarıfterdiń nege ósip jatqanyn túsindirdi. 

Energetıka mınıstrligi óz quzyreti aıasynda energetıka sektorynyń turaqty jumysyn qamtamasyz etý boıynsha jumystar júrgizýde. Ózderińiz biletindeı, tozýy 90%-ǵa jetken elektr stansıalaryndaǵy tarıfterdi kóterdik. Osy jumystyń nátıjesinde búginde 19 stansıa “qyzyl aımaqtan” shyǵyp otyr – deıdi mınıstr vedomstvoda ótken brıfıńte.

Sondaı-aq, ol ótken jyldan beri Energetıka mınıstrligi magıstraldyq jylý jelilerine jaýapty ekenin eske saldy. 2023 jyly bul salaǵa jalpy 347 mıllıard teńge ınvestısıa salynǵan, onyń bir bóligi respýblıkalyq búdjetten bólingen.

Sátqalıevtiń aıtýynsha, eger túbirtekterdegi soma durys eseptelip, bekitilgen tarıfterge sáıkes kelse, onda bul obektıvti kórsetkish bolyp sanalady. Degenmen, operatorlardyń tarapynan qatelikter bolýy múmkin ekenin de joqqa shyǵarmady.

Tólem naqty tutynylǵan kólemge qaraı esepteledi. Eger turǵyndar shyǵyndaryn azaıtqysy kelse, tutynýdy ońtaılandyrýǵa, ortaq eseptegishter ornatýǵa jáne básekelestik naryqtaǵy jetkizýshilerdi tańdaýǵa bolady, – dep túıindedi mınıstr.