Soltústik Qazaqstan oblysy Jambyl aýdany, Mırnyı aýyldyq okrýgi quramyndaǵy Aıymjan aýylynyń turǵyndary «aýylymyz joǵalýdyń aldynda tur» dep dabyl qaqty. Olardyń sózine qulaq túrsek, aýyl turǵyny Bektas Qalıuly:

–         Aýylymyz 1928 jyly qurylǵan. Negizi aýylymyz Presnovka degen jerde qurylǵan jalǵyz qazaq aýyly. Reseı shekarasynan 35-40 shaqyrym jerde ornalasqan. Sol jalǵyz qazaq aýyly Sovet ókimeti kezinde dúrkirep turǵan aýyl edi. Jeti jarǵyny jazǵan Qojabergen babamyzdyń bul jerinde kezinde140-150-deı úı bolǵan. 700-800-deı halyq ómir súrdi. Qazirgi jaǵdaıy óte nashar. Aýylymyzda mádenıet úıi men teatr tozyp, tek qańqasy qaldy. Kezinde aýyldyń ortalyǵy bolǵan jerdiń qazir jurnaǵy da joq. Kóshelerdi tipti aıtpaı-aq qoıaıyq. Aýylymyzdyń jaǵdaıy tómendegennen keıin halyqtyń teń jartysy kóship ketti, – deıdi.

Sondaı-aq ol qazirgi ýaqytta halyqty tek jalǵyz mektep qana ustap turǵanyn, áıtpegende joldyń nasharlyǵy, sýdyń joqtyǵy halyqty shydatar emestigin aıtady.

–         Aýylymyzda jalǵyz mektep bar. Onyń ózi birde tolady, birde azaıady. Biraq tek osy mektebimiz ǵana qalǵan turǵyndardy ustap tur.  Mádenıet úıimiz, eki úsh dúkenderimiz bar edi, bári qańyrap qaldy. Aýyl shetinde jerimiz bolǵan. Bankrot bolyp bankke satylyp ketti. Bos tur. Bos turǵan jer jaý shaqyrady demekshi, erteńgi kúni ózgeler ıemdenip almasa eken dep ýaıymdaımyz. Jumys joq. Óıtip-búıtip janymyzdy ózimiz baǵyp, kún kórip júrgen jaıymyz bar. Aýyzsýǵa kelsek, Esil ózeninen sý tartylǵanymen, ony eshkim paıdalanyp jatqan joq. Árkim óziniń úıiniń janynan qudyq qazyp, sol sýdy iship jatyr. Bireýiniki ashshy, bireýiniki tushshy. Taza ma, taza emes pa ony da bilmeımiz. Jaǵdaıymyz «Jańa Qazaqstannan» da nashar bolyp ketti. Qaıta Sovet ókimetiniń kezinde jaqsy edi. Jaǵdaı nashar bolsa da, úmit kútip, aýylymyzdy tastap ketpeı otyrmyz. Ákimdik jylda úıip-tógip ýáde bergenimen, onyń biri de oryndalyp jatqan joq, – deıdi Bektas Qalıuly.

Osylaısha ol aýyl turǵyndarynyń atynan «elimizde janaıqaıymyzdy  estip, aýylymyzdy qaıta kórkeıtýge kómektesetin jandar tabylsa, bir qazaq aýylyn saqtap qalar edik degen usynysyn  aıtty.