"QazMunaıGaz" ulttyq kompanıasynyń basqarma tóraǵasynyń orynbasary bolyp Qazbek Qusaıynov taǵaıyndaldy. Ol kompanıadan óz erkimen ketken Serikqalı Brekeshevtiń ornyna keldi.

Kompanıasynyń baspasóz qyzmetiniń Telegram-daǵy arnasynyń habarlaýynsha, "QazMunaıGaz" ulttyq kompanıasynyń uıymdyq qurylymynyń ózgerýine, "QMG Injınırıń" JSHS quzyretter ortalyǵy qyzmetiniń keńeıýine baılanysty keıbir bloktardyń fýnksıalary qaıta qaraldy. Atap aıtqanda, korporatıvtik damýǵa jaýapty blok kúsheıtildi, al gaz jobalaryn basqarý baǵyty munaı jáne gaz óndirý blogyna qaıta berildi.

"Qazbek Qaınarbekuly Qusaıynov QMG-nyń strategıalyq jáne korporatıvtik damýyna, turaqty damý men ESG, jobalardy basqarý tıimdiligin arttyrýǵa, sondaı-aq dekarbonızasıa jáne ekologıa máselelerine jetekshilik etetin bolady", - delingen habarlamada.

Aıta keteıik, Qazbek Qusaıynov eńbek jolyn 2000 jyly "QazTransOıl" kompanıasynda ákimshilik departamentiniń mamany bolyp bastady. Ár jyldary "QazMunaıGaz" ulttyq kompanıasynyń aktıvterdi basqarý departamentiniń bas mamany, "QazTransGaz" kompanıasynda basshylyq qyzmetterdi atqardy. M&SE JSHS bas dırektorynyń orynbasary bolyp jumys istedi. 2023 jyldyń tamyz aıynan bastap "QazTransOıl" kompanıasynyń Dırektorlar keńesiniń múshesi — táýelsiz dırektory boldy.