Mádenıet jáne aqparat mınıstri Aıda Balaeva tarıhı-mádenı muralardy saqtaýǵa jergilikti bılik qulyq tanytpaı otyrǵanyn synǵa aldy.
— Biz óz tarapymyzdan jergilikti ákimdikterge birneshe ret hat joldap, tarıhı-mádenı muralarymyzdy saqtaýǵa qatysty usynystarymyzdy jiberdik. Alaıda keıbir jergilikti atqarýshy organdar bul máselege jiti nazar aýdarmaı otyr. Osy oraıda, mınıstrlik júıeli sharalardy qamtıtyn 3 baǵyttaǵy jospar jobasyn jasap, memlekettik organdarmen kelisip, Úkimet qaraýyna usynýǵa daıyn, — dedi Mádenıet mınıstri Úkimettiń búgingi otyrysynda.
Bul jospar jergilikti ári halyqaralyq deńgeıde ártúrli jumystardy uıymdastyrýǵa negizdelgen. Ondaǵy birinshi baǵyt — IýNESKO qorǵaýyndaǵy eskertkishtermen keshendi jumys júrgizý. Bul baǵytta basym máseleler qataryna IýNESKO standarttaryn saqtaý, qorǵalatyn jáne zamanaýı býferlik aımaqtardy monıtorıńileý tehnologıalaryn engizý, Búkilálemdik mura tizimindegi 3 nomınasıany (10 eskertkish) basqarýdyń menedjment-josparyn ázirleý bar.
— Prezıdent tapsyrmasyna sáıkes, 2025 jyldyń qańtarynda IýNESKO qaraýyna eki nomınasıalyq qujat joldandy. Olar — «Mańǵystaý jerasty meshitteri» jáne Qyrǵyzstan, Tájikstan, Ózbekstanmen birlesip daıyndalǵan «Jibek joly. Ferǵana-Syrdarıa dálizi» transulttyq nomınasıasy. Halyqaralyq reglamentterdi eskere otyryp, 2026 jyly IýNESKO tizimine 11 jańa qazaqstandyq eskertkishti engizý maqsatynda tıisti jumystar júrip jatyr, — dedi A. Balaeva.
Jaqynda ǵana «Betashar» rásiminiń mádenı mańyzdylyǵy halyqaralyq deńgeıde tanyldy. Taıaýda «Salbýryn» men «Alpamys batyr» nomınasıalary boıynsha qujattar ázirlenip, IýNESKO qaraýyna usynyldy.
Oǵan qosa, Qyzylordadaǵy 3 tarıhı-mádenı nysan IýNESKO tizimine enýi múmkin.
Buǵan deıin Mádenıet mınıstri Qoja Ahmet Iasaýı kesenesi mańynda kelisilmegen qurylys toqtamaı turǵanyn aıtqan edi.
