Voleıbol týrnıriniń jeńimpazdary belgili boldy.

Almaty qalasy Jastar saıasaty basqarmasynyń «Dúısenbilik sport» jobasy aıasynda NEET sanatyndaǵy jastar arasynda voleıboldan ótken týrnır máresine jetti. Social project management ortalyǵynyń uıymdastyrýymen ótken jarysqa «Salamat», «Baısat», «Altyn orda», «Tastaq» jáne taǵy basqa bazarlardan jáne jumyssyz jastardan quralǵan 16 komanda qatysty.

Alǵashqy kún týrnırdiń irikteý oıyndaryna arnaldy. Ár komandada qyzdar men jigitter aralas boldy. Tórt topqa bólingen komandalar ózara baq synasyp, kelesi aınalymǵa shyǵatyn komandalardy anyqtaý úshin baryn saldy. Týrnır erejesine saı komandalar eki set oınaýǵa tıis boldy, eger oıyn 1:1 esebimen aıaqtalsa, úshinshi set oınatyldy. Sóıtip jeńimpaz 2:1 esebimen anyqtalyp otyrdy.

İrikteý oıyndarynyń nátıjesine sáıkes grand fınalǵa «Aqbulaq», «Arystan», «Jańa Ialán», «Batyr» komandalary joldama aldy.

Jarys qorytyndysy boıynsha 1-oryndy“Aqbulaq” bazarynan kelgen komanda ıelenip, 250 myń teńgeniń sertıfıkatyn qanjyǵasyna baılady. 2-oryn “Arystan” bazarynyń oıynshylaryna buıyryp,olar 150 myń teńgeniń sertıfıkatyn enshiledi. “Jańa Ialán” bazary men “Batyr” bazarynyń voleıbolshylary 3-oryndy ózara bólisip, árqaısysy 50 myń teńgeden oljalady.

Aıta keteıik, buǵan deıin «Dúısenbilik sport» jobasy aıasynda Almaty qalasyndaǵy bazar jastary arasynda shaǵyn fýtboldan, ústel tenısinen, kıbersporttan týrnırler ótken bolatyn. Búgingi voleıbol jarysy osy joba aıasynda ótken tórtinshi týrnır. Aldaǵy ýaqytta basketboldan týrnır ótkizý josparlanyp otyr.