Áleýmeti+tik jelide Marat Jylanbaevtyń túrmedegi fotosy jarıalandy. Fotony Adam quqyqtary boıynsha ýákildiń janyndaǵy úılestirý keńesiniń hatshysy Raısa Sher óziniń feısbýk jelisindegi paraqshasynda jarıalaǵan.
Raısa Sher óz jazbasynda Stepnogorsk qalasyndaǵy Marat Jylanbaev jazasyn ótep jatqan túzeý mekemesine arǵanyn jazǵan.
"Kezdesý kezinde onyń densaýlyǵyna qatysty aqparat tarap jatqanyn aıttym. Ol 45 kelige deıin aryqtap ketken degen aqparatty aıtqanymda tańǵaldy. Marat Jylanbaev mundaı jalǵan aqparatty kim jáne ne sebepti taratyp jatqanyn bilmeıtinin jetkizdi. Onyń qazirgi jaǵdaıy jaqsy. Densaýlyǵyna baılanysty eshqandaı shaǵymy joq. Sondaı-aq ol turaqty túrde sportpen shuǵyldanady. Ásirese óziniń súıikti sport túri júgirýmen aınalysady, kitaphanada kitap oqıdy", dep jazǵan Raısa Sher óziniń jazbasynda.
61 jastaǵy Marat Jylanbaev – Gınnestiń rekordtar kitabyna engen jeti rekordtyń ıegeri atanǵan últramarafonshy retinde kópke tanylǵan. Ol tirkelmegen opozısıalyq "Alǵa, Qazaqstan!" partıasyn qurý jónindegi bastamashyl top jetekshisi bolǵan. 2023 jyldyń kókteminde belsendi qamaýǵa alynyp, onyń isin jabyq qaraǵan Astana soty sol jyly qarashada Marat Jylanbaevty "ekstremıstik uıym isine aralasty" jáne "ekstremızmdi qarjylandyrdy" degen aıyp boıynsha jeti jylǵa bostandyǵynan aıyrǵan.
