Oıynǵa táýeldilik nemese lýdomanıa Qazaqstanda kún ótken saıyn eleýli áleýmettik problemaǵa aınalýda. Densaýlyq saqtaý mınıstrliginiń málimetinshe, 2024 jyly respýblıkanyń stasıonarlarynda "qumar oıyndarǵa táýeldilik" dıagnozymen 69 pasıent emdeldi, al 2025 jyldyń birinshi jartyjyldyǵynda – 47 adam táýeldilikten aryldy.

Statısıka

Elde osyndaı pasıentter boıynsha resmı statısıka júrgizilýde: 2025 jylǵy 1 shildege dıspanserlik esepte 30 adam turdy, al bir jyl buryn 15 adam bolǵan. Sonymen qatar, lúdomanıamen aýyratyndardyń kópshiligi 18 ben 35 jas aralyǵyndaǵy er adamdar. Aýrýdyń bastalýynyń ortasha jasy – 25-30 jas aralyǵynda. Kámeletke tolmaǵandarda oıynǵa táýeldilikti tirkeý jaǵdaılary tirkelmegen.

Qazaqstanda lýdomanıamen qalaı kúresedi?

2024 jyldan bastap Qazaqstanda oıynǵa táýeldilikti damytý qaýpi bar adamdar úshin konsýltatıvtik baqylaý engizildi. Dınamıkalyq baqylaýdan aıyrmashylyǵy, bul format adamǵa jalpy málimetter bazasyna kirmeı-aq erikti jáne qupıa túrde kómek suraýǵa múmkindik beredi. Sarapshylar bul qoldaý suraýdaǵy kedergilerdi azaıtatynyn jáne buzylýdy ýaqytynda anyqtaýǵa kómektesetinin atap kórsetedi.

Memleket zańsyz oıyn bıznesi men lúdomanıaǵa qarsy is-qımyldyń 2024-2026 jyldarǵa arnalǵan keshendi josparyn iske asyrýda. Onyń aıasynda jastar arasynda aldyn alýǵa basa nazar aýdaryldy. Mektepter men joǵary oqý oryndarynda oıynǵa táýeldiliktiń aldyn alý boıynsha ádistemelik materıaldar engizilip, psıhologtarǵa arnalǵan trenıńter ótkiziledi. Tek 2024 jyly ǵana 656 bilim berý mamandary daıarlyqtan ótti. Joǵary oqý oryndarynda, sport klýbtarynda, áskerı bólimderde jáne memlekettik mekemelerde aqparattyq sesıalar men semınarlar uıymdastyrylady, býkletter men beınerolıkter taratylady.

Óńirlerde psıhıkalyq densaýlyq ortalyqtary jumys isteıdi. Onda azamattar medısınalyq kómektiń kepildik berilgen kólemi sheńberinde tegin kómek ala alady. Dertke shaldyqqandarǵa respýblıkalyq deńgeıdegi psıhıkalyq densaýlyq ǵylymı-praktıkalyq ortalyǵy qoldaý kórsetedi. Munda medısınalyq-áleýmettik, psıhoterapıalyq jáne ońaltý kómegi qol jetimdi.

Osylaısha, Qazaqstan jastar arasyndaǵy profılaktıkadan bastap qoljetimdi jáne tegin ońaltý baǵdarlamalaryn qurýǵa deıin lýdomanıamen kúresýdiń keshendi tásilin qalyptastyrýda. Mamandardyń pikirinshe, bul erte anyqtaý, psıhologıalyq qoldaý jáne qoǵamdyq aqparattandyrýdyń úılesimi osy táýeldiliktiń aýqymyn azaıtýǵa jáne halyqtyń psıhıkalyq densaýlyǵyn nyǵaıtýǵa múmkindik beredi.