Áskerde jaralanǵan sarbaz Erbaıan Muhtar emdelý úshin Ystanbýlǵa ushyp ketti. Bul týraly advokat Inga Imanbaı óziniń feısbýk paraqshasynda habarlady.
"Erbaıan emniń ekinshi kezeńi – tolyqqandy reabılıtasıadan ótý úshin tańǵy beste Stambýlǵa ushyp ketti. Qasynda anasy men ákesi bar. Bul sapar Erbaıan úshin sheshýshi kezeń. Sol sebepti barlyǵymyz birge balamyzǵa aq jol, sátti sapar tileıik. Sońǵy bir jylda Erbaıan tek ata-anasynyń emes, búkil halyqtyń ulyna aınaldy. Onyń jaǵdaıy eshkimdi beı-jaı qaldyrmady. Birinshi kezeńdegi operasıa men em halyqtyń qoldaýymen jasalsa, bul joly memleket tarapynan úlken kómek kórsetildi: portal arqyly úsh aıǵa sozylatyn qymbat ári mańyzdy reabılıtasıalyq em tolyq qarjylandyryldy. Al ushýdy İshki ister jáne Qorǵanys mınıstrlikteri birlesip uıymdastyrdy", dep jazdy Inga Imanbaı.
Advokat Erbaıannyń Ystanbýlǵa ýshýy úshin İshki ister mınıstrligi men Qorǵanys mınıstrligi kómekteskenin aıtty.
"Osy rette Erbaıannyń ata-anasynyń atynan Densaýlyq saqtaý mınıstri Aqmaral Álnazarova hanymǵa, general Qaırat Úmbetov myrzaǵa alǵys bildiremiz. Erbaıanǵa qatysty «ne istep jatyrsyz?» dep maǵan jıi suraq qoıasyzdar. Jaýapty kóp sózben emes, osyndaı naqty nátıjelermen bergim keledi. Halyqtyń nazaryn aýdartý, memlekettik organdardy iske jumyldyrý, osyndaı mańyzdy emdi uıymdastyrý – bir kúnniń sharýasy emes. Bul uzaq kelissózder men tabandy eńbektiń jemisi. Aıqaısyz, biraq júıeli jasalǵan jumys", deıdi Inga Imanbaı.
Onyń sózinshe, aldaǵy úsh aıda Erbaıannyń densaýlyǵy baqylaýda bolady.
