Astanada birneshe uıym 15 qyrkúıekten bastap jańa jumys kestesi boıynsha jumys isteıdi. Bul sheshim joldarda keptelisti azaıtý maqsatynda qabyldanyp otyr, - dep habarlaıdy qala ákimdigi.

Ózgerister qala ortalyǵynda ornalasqan memlekettik jáne jartylaı memlekettik qurylymdarǵa qatysty ekeni aıtyldy.

"Osyǵan sáıkes, 15 qyrkúıekten bastap qalalyq komýnaldyq qyzmetterdiń jumys kúni tańǵy 7:30-da bastalady, Astana ákimdiginiń qyzmeti – 7:30, keıbir memlekettik organdar men jartylaı memlekettik kompanıalar – 7:30-8:00 aralyǵynda bastaıdy. Jumys ýaqytynyń aıaqtalý saǵaty da sáıkesinshe ózgertiledi", - delingen habarlamada.

Jeke sektor, bıznes, mektepter, balabaqshalar, aýrýhanalar, emhanalar, HQO jáne basqa áleýmettik nysandardyń jumys kestesi ózgermeıdi. Aıta keteıik, keıbir mınıstrlikter men memlekettik organdardyń jumys kúni burynnan 8:00-de bastalady.