Qazaqstan Respýblıkasy Premer-mınıstriniń orynbasary Ermek Kósherbaev Germanıanyń Týrısik qaýymdastyǵynyń (DRV) delegasıasymen, sondaı-aq jetekshi nemis týroperatorlarymen kezdesý ótkizip, týrızm salasyndaǵy yntymaqtastyq máselelerin talqylady.
Kezdesýge Germanıa Týrısik qaýymdastyǵynyń prezıdenti Norbert Andreas Fıbıg, nemis týroperatorlarynyń ókilderi, sondaı-aq Qazaqstan Respýblıkasynyń týrızm jáne sport mınıstri Erbol Myrzabosynov qatysty.
Kezdesýdi asha otyryp, Ermek Kósherbaev Qazaqstan Germanıa Federatıvtik Respýblıkasymen baılanystardy nyǵaıtýǵa erekshe mán beretinin, al týrızm ekijaqty yntymaqtastyqty damytýdyń mańyzdy baǵyty bolyp sanalatynyn atap ótti.
«Qazaqstan úshin týrızm – tek ekonomıkanyń salasy ǵana emes, eki el arasyndaǵy senim kópiri. Germanıamen yntymaqtastyq bizdiń elimizdi eýropalyq naryqta ilgeriletý úshin jańa múmkindikter ashady. DRV Destination Forum-dy Qazaqstanda ótkizý múmkindigin talqylaý ózara qyzyǵýshylyqty arttyrý men áriptestikti damytý jolyndaǵy mańyzdy qadam », – dedi vıse-premer.
Kezdesýdiń negizgi taqyryby – nemis naryǵynda Qazaqstandy týrısik baǵyt retinde ilgeriletý perspektıvalary, sondaı-aq 2026 jyly elimizde DRV Destination Forum-dy ótkizý múmkindigin qarastyrý boldy.
Germanıa Týrısik qaýymdastyǵynyń prezıdenti Norbert Andreas Fıbıg nemis týrısik naryǵy úshin Qazaqstannyń tartymdylyǵyn atap ótti.
«Qazaqstanǵa kelip, onyń týrısik áleýetin óz kózimizben kórýge múmkindik týǵanyna qýanyshtymyz. Elińizdiń biregeı tabıǵaty, baı tarıhy jáne zamanaýı damýy ony nemis týrıseri úshin tartymdy baǵyt etedi. Nemis týrıseri jyl saıyn 85 mlrd eýrodan astam qarjy jumsaıdy, jáne biz Qazaqstannyń olardyń tańdaýly baǵyttarynyń qatarynan laıyqty oryn alatynyna senimdimiz», – dedi ol.
Nemis delegasıasynyń sapar baǵdarlamasyna Astana, Almaty jáne Baıqońyr qalalaryna barý engizilgen. Qonaqtar Qazaqstannyń týrısik áleýetimen jáne birlesken jobalardy damytý múmkindikterimen tanysady.
Kezdesý sońynda Ermek Kósherbaev Qazaqstan men Germanıanyń birlesken kúsh-jigeri eki el arasyndaǵy yntymaqtastyq pen dostyqty odan ári nyǵaıtýǵa septigin tıgizetinine senim bildirdi.
