Qazaqstanda nashaqorlyqpen kúres kúsheıip keledi. Búginde 18 myńnan astam azamat narkolog-dárigerlerdiń baqylaýynda, olardyń basym bóligi – jastar. Sońǵy bes jylda tárkilengen sıntetıkalyq esirtki kólemi 143 esege artqan. Tek bıyldyń ózinde quqyq qorǵaý organdary 5 myńnan astam esirtki qylmysyn anyqtap, qoǵamdaǵy jaǵdaıdyń qanshalyqty kúrdeli ekenin kórsetti. Bul sandar – dabyl qaǵarlyq deńgeıde. Nashaqorlyq endi jaı ǵana qaýip emes, tutas bir býynnyń dertine aınalyp otyr, dep habarlaıdy «AMANAT» partıasynyń baspasóz qyzmeti.
«AMANAT» partıasynyń «Jastar Rýhy» jastar qanaty úshinshi jyl qatarynan elimizde «Esirtkige jol joq!» aksıasyn ótkizip keledi. Bul bastama qazirdiń ózinde nashaqorlyq pen esirtki qylmystaryna qarsy kúrestiń basty baǵyttarynyń birine aınaldy. Myńdaǵan erikti kún saıyn esirtki nasıhatyna tosqaýyl qoıyp, «Zań men tártip» qaǵıdatyn kúsheıtýge jáne salaýatty ómir saltyn nasıhattaýǵa atsalysyp otyr.
Aksıa Memleket basshysy Qasym-Jomart Toqaevtyń tapsyrmalaryn oryndaý aıasynda júzege asyrylýda. Prezıdent birneshe ret nashaqorlyqpen kúresti kúsheıtýdiń qajettiligin atap ótken bolatyn. Bıyl qańtarda Toqaev esirtki qylmystary úshin jazany kúsheıtetin zańǵa qol qoıdy. Qujatqa sáıkes, esirtki bıznesin uıymdastyrýshylar men zańdy buzǵan quqyq qorǵaýshylarǵa ómir boıyna bas bostandyǵynan aıyrý jazasy engizildi. Zań jobasyn Májilistegi «AMANAT» partıasy fraksıasynyń músheleri ázirledi. Al tamyz aıynda ótken Qaýipsizdik Keńesiniń otyrysynda Prezıdent memlekettik saıasattyń nashaqorlarǵa keńshilik tanytyp, al esirtki saýdasyna kelgende qatań jáne múlde tózbeýshilik ustanymda bolýǵa tıis ekenin erekshe atap ótti.
«Esirtki qylmyskerleri jańa aqparattyq tehnologıalardy belsendi qoldanýda. Áleýmettik jeliler arqyly jastardy jeńil jolmen tabys tabýǵa qyzyqtyryp, olardy esirtki tasymaldaýshylarǵa aınaldyryp otyr. Bul – tutas býynǵa tóngen úlken qaýip. Sondyqtan Prezıdent birneshe ret osy áleýmettik keselge erekshe nazar aýdardy. Biz de nashaqorlyqpen kúreske óz úlesimizdi qosyp kelemiz. Úsh jylǵa jetpeı, 12 myń narkograffıtıdi joıdyq», – dedi «Jastar Rýhy» tóraǵasy Aqerke Iskanderova.
Rýhtastar tek esirtki jarnamasyn joıýmen shektelmeı, jastar arasynda aqparattyq materıaldar taratyp, júzdegen kezdesý men fleshmob uıymdastyrýda. Tek sońǵy aılarda elimizdiń ár óńirinde shamamen 5 myń jas aksıaǵa qatysty. Máselen, Óskemende polısıa stýdentterge esirtki tasymaldaýshylardy ustaýdyń úlgisin kórsetti. Quqyq qorǵaýshylar graffıtı arqyly esirtki jarnamalaǵany úshin qylmystyq jaýapkershilik qarastyrylǵanyn eskertti. Qazir óńirde arnaıy monıtorıń toby jumys isteıdi. Olar tyıym salynǵan jarnamalar týraly derekterdi polısıaǵa joldap otyr.
Salaýatty ómir saltyn nasıhattaý da basty nazarda. «Chempıondyq rýh» jobasy arqyly «Jastar Rýhy» jastar qanaty jasóspirimder men stýdentterdi sportqa tartyp, chempıondarmen kezdesýler men motıvasıalyq sesıalar uıymdastyrýda. Baǵdarlama aıasynda elimizdiń barlyq óńirinde týrnırler, sheberlik sabaqtary men jattyǵýlar ótkizilip keledi. İs-sharalarǵa ondaǵan tanymal sportshy men myńdaǵan jasóspirim qatysýda.
Sporttyq bastamalardan bólek, «Jastar Rýhy» jastar qanaty zamanaýı formattardy da belsendi qoldanýda. «Bir Tolqynda» jáne «Rýhtastar Cases» dıalog alańdary jastar arasynda suranysqa ıe bolsa, IT salasynda da ınovasıalyq jobalar qolǵa alynǵan. Máselen, 2023 jyly Astana Hub-pen birlesip «AMANAT TECH» atty respýblıkalyq hakaton ótkizildi. Baıqaýda qatysýshylar nashaqorlyqqa qarsy kúres pen táýeldilerdi ońaltýǵa arnalǵan tyń sheshimder usyndy.
Osylaısha «Jastar Rýhy» jastar qanaty elimizde esirtkige tózbeýshilik mádenıetin qalyptastyryp, «Zań men tártip» qaǵıdatyn nyǵaıtýǵa úles qosyp keledi. Rýhtastar barlyq baǵytta júıeli ári úzdiksiz jumys júrgizýde – kóshelerdegi narkojarnamalardy joıýdan bastap jańa sıfrlyq servısterdi qurýǵa deıin. «Esirtkige jol joq!» aksıasy memlekettiń, partıanyń jáne jastardyń kúsh-jigerin biriktirgen turaqty qozǵalysqa aınaldy.
