«Keleshek mektepteri» ulttyq jobasy aıasynda josparlanǵan 217 mekteptiń 150-i qazirdiń ózinde jumys istep tur. Qalǵan mektepterdiń qurylysy aldaǵy úsh aı ishinde aıaqtalýǵa tıis. Prezıdent Qasym-Jomart Toqaevtyń sońǵy joldaýynda osylaı degen bolatyn. Barlyq balalarǵa jaǵdaı jasalǵan «Keleshek mektepteri» týraly ne bilemiz?
«Keleshek mektepterinde» jıhazdan jaryqtandyrýǵa deıin bári oılastyrylǵan. Keń kabınetter, demalys aımaqtary, zamanaýı ári yńǵaıly ájethana – balalardyń tek bilimge nazar aýdarýy úshin barlyq jaǵdaı jasalǵan.
Árbir mektep beınebaqylaýmen, mektepke kirip-shyǵý úshin arnaıy basqarý júıesimen jabdyqtalǵan. Al kishkentaılar men jasóspirimderge yńǵaıly jáne qaýipsiz orta jasaý úshin kishi jáne joǵary synyptar birneshe bloktarǵa bólingen.
Mundaı mektepterde zerthanalar, robototehnıka, sheberhanalar da zamanaýı úlgide jasaqtalǵan. Munda olar baǵdarlamalaýdy, zertteýdi, topta jumys isteýdi úıretedi.
Prezıdent Qasym-Jomart Toqaev óz Joldaýynda jasandy ıntellektti damytýdyń erekshe mańyzdylyǵyn jáne mektep oryndyǵynan osy salada quzyrettilikti qalyptastyrý qajettigin atap ótti.
Ybyraı Altynsarın atyndaǵy ulttyq bilim akademıasynyń Strategıa jáne taldaý ortalyǵynyń bas sarapshysy Aıda Ábiláqymovtyń aıtýynsha, Bilim Mınıstrligi bilim berý prosesine Jasandy ıntelektini engizý boıynsha júıeli jumys júrgizýde.
Onyń aıtýynsha, "Sıfrlyq saýattylyq" jáne "Informatıka" pánderi boıynsha oqý baǵdarlamalaryna jasandy ıntellektpen baılanysty jańa modýlder biriktirilgen: derektermen jumys isteý negizderi, Algorıtmder, Mashınalyq oqytý, sıfrlyq etıka jáne kıberqaýipsizdik. Joǵary synyptarda oqýshylar JI qoldaný elementteri bar jobalyq tapsyrmalardy meńgeredi.
Infraqurylymdyq jaǵdaılar «Keleshek mektebi» jobasy sheńberinde qurylady: mektepter jańǵyrtylady, STEM-kabınetter ashylady, ınternet-qoljetimdilik kúsheıtiledi, bul ásirese aýyl mektepteri úshin mańyzdy.
- Osylaısha, Prezıdent qoıǵan mindetter dáıekti túrde iske asyrylýda. Qazaqstan mektepterindegi jasandy ıntellekt muǵalimdi almastyrý retinde emes, oqýshylardyń oılaýyn, shyǵarmashylyǵy men sıfrlyq saýattylyǵyn damytý quraly retinde qarastyrylady, — dep atap ótti Aıda Ábiláqymova.
