Almaty qalasynyń ákimi robototehnıka jáne jasandy ıntellekt salasyndaǵy strategıalyq yntymaqtastyqty bastaý maqsatynda AgiBot kompanıasynyń negizin qalaýshynyń birimen kezdesti.
Shanhaı qalasyna jasaǵan jumys sapary aıasynda Almaty ákimi Darhan Satybaldy AgiBot kompanıasynyń negizin qalaýshy jáne tehnıkalyq dırektory Pen Chjıhýeımen (Peng Zhihui) kezdesti. Ol – jańa býynnyń jetekshi robototehnıka ınjenerleriniń biri.
Sapar barysynda Almaty qalasy Sıfrlandyrý basqarmasy, Astana Hub jáne AgiBot (Shanhaı, QHR) arasynda ózara túsinistik týraly Memorandýmǵa qol qoıyldy. Qujat robototehnıka men jasandy ıntellekt baǵyttaryndaǵy ozyq sheshimderdi damytýǵa, sondaı-aq Almatyny embodied AI jáne servıstik robototehnıka boıynsha Ortalyq Azıadaǵy negizgi ortalyqtardyń birine aınaldyrýǵa baǵyttalǵan.
AgiBot – 2023 jyly qurylǵan robototehnıka kompanıasy. Ol “Embodiment + AI” platformasyn damyta otyryp, Yuanzheng, Lingxi jáne Genie atty gýmanoıdty jáne servıstik robottar jelilerin shyǵarady. Kompanıa álemdik naryqta qarqyndy damyp kele jatqan oıynshylardyń qatarynda, ınvestorlarynyń arasynda Sequoia, Baidu Ventures, Tencent, BYD, TCL jáne LG Electronics bar.
Taraptar Almatyda Robotech R&D zerthanasyn qurý, qalalyq ortada robottardy oqytýǵa arnalǵan «derekter fabrıkasyn» iske qosý, logıstıka, ónerkásip, medısına jáne bilim berý salalarynda pılottyq jobalardy júzege asyrý, sondaı-aq robototehnıka men jasandy ıntellekt salasynda kadrlar daıarlaý jóninde kelisim jasasty.
Atalǵan seriktestik Qazaqstan men Qytaı arasyndaǵy joǵary tehnologıa salasyndaǵy yntymaqtastyqty damytýda mańyzdy qadam bolmaq
