Aqpannyń 16-sy kúni Almatydaǵy táýelsizdik eskertkishi turǵan ortalyq alańǵa ulttyq valúta - teńgeniń devalvasıasyna narazylyq bildirýge kelgen adamdardyń keıbireýin polısıa ustap alyp ketti. Azattyq tilshileriniń habarlaýynsha, polıseıler sońǵy bir saǵattyń ishinde taǵy da jeti adamdy ustap, Bostandyq aýdandyq ishki ister basqarmasyna alyp ketken. Sonymen birge polısıa qyzmetkerleri alańdaǵy oqıǵaǵa kýá bolǵan jas azamattardyń keıbiriniń mobıldi telefondaryn ashyp qarap, oǵan ne túsirgenderin teksergen. Saǵat on ekiler shamasynda táýelsizdik eskertkishine ótýge áreket jasaǵan belsendiler Janna Baıtelova men Evgenıa Plahınany polısıa qyzmetkerleri ustap, alyp ketken. Sonymen birge basyna áıeldiń shilter ishkıimin kıip alǵan belsendi Valerıa Ibraevany da polısıa ustaǵan (buǵan deıin Kedendik odaq aýmaǵynda «reglamentke saı emes» dep tanylǵan álgindeı ishkıimdi shyǵarýǵa, engizýge jáne satýǵa tyıym salynǵany týraly habar taraǵan edi). Polısıa qyzmetkerleri alańda bolyp jatqan oqıǵany túsirmek bolǵan jýrnalıserdi ol jerden yǵystyryp tastaǵan.

Tańerteńnen qyzyl jolaqty lentamen qorshalyp, «Jóndeý jumystary júrgizilip jatyr» degen jazý ilingen táýelsizdik eskertkishi ornalasqan alańda qazir tek ondaǵan polısıa qyzmetkerleri men prokýratýra ókilderi júr, bir shette eki avtobýs men birneshe polısıa kóligi tur dep habarlady Azattyq tilshisi. Buǵan deıin bılik ókilderi táýelsizdik eskertkishi aldynan úsh áıeldi - Janna Baıtelova, Evgenıa Plahına men Valerıa Ibraevany ustap áketken edi. Qazaqstannyń ulttyq valútasy - teńgeniń devalvasıasyna narazy azamattar aqpannyń 16-sy kúni Almatydaǵy táýelsizdik eskertkishi turǵan ortalyq alańǵa jınalatyny týraly buǵan deıin áleýmettik jeliler arqyly aqparat taraǵan bolatyn. Azattyq radıosy

(Taqyryp ózgertilip berildi)