ÓZ SÓZİM ÓZİMDİKİ nemese halyq tolqysa, ne isteımiz? Halyq tolqysa, ne bolady? Bul suraqqa jaýap bere alasyz ba? Birinsheden, shek keltirmeımin, búkil qazaq bir jaǵadan jeń shyǵaryp, kúsh biriktirse, bılikti tóńkerilip tastaýy ábden múmkin. Biraq, sol tóńkerilgen taǵyńyzǵa kim keledi? Bilmeısiz. Rýhty azamat kelse, qazaqqa - baq, al rýhsyz bolsa - sor. "Saqal surap júrip, múıizden aırylasyz". Ekinshiden, múıiz degennen shyǵady. Sol soqtaldaı múıiz bizde joq-aý! Biz toqal eshki sekildimiz. Al, bılik - múıizdi buqa. Ony keshegi oqıǵadan kórip bildińiz. Qazaq kóshege shyǵyp qyrylyp ketse, onyń obaly tek bılikte ǵana ma? Joq, sol qyrǵynǵa jol berip otyrǵan Siz ben Biz de kináli bolmaqpyz. Máselen, Jańaózende qyrylǵan qazaqtyń joqtaýshysy bola alyp júrmiz be, búgin. Sol dúrbeleńde otaǵasy opat bolyp, qan jylap qalǵan otbasylardyń jaıyn oıladyq pa? Janary jasqa tolǵan sansyz sábılerge medeý bola bildik pe? Joq. Sol kezde saıası sahnada "geroı" bolǵandardyń deni ózi saıası upaı jınap alǵan soń, tabanyn jaltyratty. Endi halyq tolqysa, sol senarı qaıtalanbasyna kim kepil? Úshinshiden, bizdiń bılik qaıtken kúnde de beıbit sherýdi kúshpen basyp tastaıtynyn dáleldep boldy. Sony bile tura otqa qaraı júgirý bizdi ushpaqqa shyǵara ma? Men, sen, ol jáne olar - halyq ókilderi. Bizdiń sózimizdi "kóterilisqumar" radıkaldar da, bılik te tyńdaǵan emes, tyńdamaıdy da... Olar qazaqtyń basyn saýdaǵa salyp, qurban etýdiń oıynyn oınaı bermek. 1986 jyly da sóıtken. Sondyqtan da, kóshege shyǵa qalsaq, ıakı shyqqandarǵa sabyr, salqynqandylyq hám mádenıet qajet. Qorshaýǵa alǵan jasaǵyńnyń ózi - óz qandasyń, óz baýyryń... Men oń solyn tanymaǵan jastardyń jastyq jalynymen otqa oranǵanyn qalamaımyn. Olar ózi ańsaǵan kúnge beıbit túrde eńbek etip, jetse eken deımin! Tórtinshiden, biz maqsatymyzǵa kóterilis arqyly ǵana jetemiz deý beker. Biraq, halyq solaı oılasa, biz ben sizdiń, bılik pen opozısıanyń oǵan shekteý qoıa almasy anyq. Ondaı jaǵdaıda ne istemek kerek? Halyqtyń jaǵyna shyqqan jón. Óıtkeni, bılik - júzjyldyq, al qazaq - máńgilik.