Sózińiz bolsadaǵy qurysh naǵyz,

Aıbarly arystanǵa juǵyspańyz.

Adamǵa basty pále tilden degen,

Kóbinde aýyzymyzdy qulyptaımyz.

Danalardyń úńilip taǵylymyna,

Babalardyń dástúrin ulyqtaımyz.

Qytaıdaǵy qazaqtan alańdama,

Daýyl men jaýyn kórip shynyqqanbyz.

Úısin, Ǵundar, Túrgeshter kindik qany,

Tógilgen jerde júrgen týystarmyz.

Taýǵa qarap ulıtyn bóltirikpiz,

Sondyqtan, tegimizdi umytpaımyz.

Daýyldarda qulaǵan baıterektiń,

Tuǵylynan kóktegen shybyqtaımyz.

Úısin taý, Boǵda, Jaıyr arasynda,

Babalar izi qalǵan nanasyń ba?

Aýnaǵan dúldúlderdiń túgi qapty,

Emil, İle, Qyrannyń jaǵasynda.

Qabanbaı, Raıymbek, Jánibekter,

Halqy úshin maıdan qurǵan dál osynda.

Aqteke, Ákbar - Seıit esimderi,

Qazaqtyń saraı salǵan sanasyna.

Tańjaryq, Aqyt, Kódek - alyp shynar,

Er jettik biz solardyń saıasynda.

Solardyń rýhymenen el serpilip,

Dástúrdiń dánin ekken dalasyna,

"Rýhtylar moıymas qıyndyqqa",

Degen sóz bar qurannyń aıatynda.

Aqyndardyń arnaýly mektebi bar,

Qytaıdyń Kúıtún degen qalasynda,

Ahmet Baıtursynov jazýymen,

Jastardyń óz tilinde bári oqýda.

Eki tildi shetinen meńgergenmen,

Abaıdaı qurmeti mol babasyna.

Qazaqtyń pák kóńili kirlemese,

Qalmaıdy jat bireýdiń tabasyna,

Mende sol Saıram kóldiń aqqýy edim,

Hat baılap ushyrdy elim qanatyma.

Jaılaǵan azıanyń apaı tósin,

Aq sálem ala keldim Alashyma!

Arzygúl Qaıyńbekqyzy

Aıtys aqyny Aıbek Qalıevpen bolǵan aıtysynda áriptesiniń «Qytaıdaǵy qandastardyń taǵdyryna alańdaımyn» degenine jaýaby.