Bul kúnde kende emespiz merekeden,

Toılaǵan keıbireýin el erteden.

Keıbiri telimeli, keıi jańa,

Kelsinshi bári áıteý berekemen.

Mereke  degenmenen máni bólek,

Keıiniń kóńildegi sáni erek.

Bostandyq tańy atqan - táýelsizdik,

Kelesiń júregimdi ánge bólep.

Sarqylmas máńgiliktiń syryn alǵan,

Elimniń merekesi  uly maǵan.

Bul toıdy toılamaǵan bolmas qazaq,

(Qasqyrda, qasqyr emes ulymaǵan).

Dárıǵaı jetpeı ántek baǵasyna,

Qalmaıyq  táýelsizdik nalasyna,

Merekem jat ańshydan sekem alǵan,

Aqqýdaı qona almaı júr dalasyna.

Túse almaı azat eldiń alqasyna,

Kelesiń  shyrshalardyń qalqasynda.

Qazaqqa basty baılyq sen ediń ǵoı,

Ketpegin jat pıǵyldyń qaltasynda.

Aǵyzyp janarymnan qan-irińdi,

Ozbyrlar ormaq bolǵan  tamyrymdy,

Sol shaqta azattyǵym qorǵap  qaldyń,

Al búgin bilmeı kelem qadirińdi.

Tarıhyn tasqa jazǵan qazaq ákem,

Óshpesteı tamyrym bar, az-aq átteń.

Shyn toılaý merekeni ǵajap sirá,

Daqpyrt pen jalǵan toılaý mazaq  eken.

Turǵandaı sezinemin  Mızamkókte,

Kún kózi jibigendeı sonaý kókte.

Bozdaqtyń  qany menen jasy sińgen,

Úmitter buǵyp jatar jasyl shópte .

Qaster Sapqytqan