Ǵylymdy qarjylandyrý jyldan-jylǵa ulǵaıyp kele jatqanyna qaramastan otandyq ǵylym ázirge el ekonomıkasynyń múddesi úshin jumys istemeı tur. Ǵylym men óndiristiń arasy alshaqtap ketti. Bul pikirdi «Nur Otan» partıasynyń Baspasóz ortalyǵynda ótken brıfıńte Parlament Májilisiniń depýtaty Ýálıhan Bıshimbaev aıtty, - dep habarlaıdy «Qamshy» portaly Baq.kz-ke silteme jasap.

 Qazir elimizde 392 ǵylym uıym turaqty jumys istep tur. Alaıda, jasalyp jatqan zertteýlerdiń nátıjelerine, ǵylymı jańalyqtarǵa, jańa tehnologıalarǵa bıznes tarapynan áli suranys joq. Kóptegen ǵylymı zertteýler zerthanalardan aspaı jatyr. Ǵalymdarymyz oılap tapqan jańa tehnologıalardyń kóbi tájirıbeden ótkizilmesten, kezekti ǵylymı jańalyq retinde tirkeledi de, qaǵaz júzinde qalyp qoıady. Bul jaǵdaı ınovasıalardy komersıalandyrýǵa da múmkindik bermeı otyr. Endi mundaı olqylyqty joıý úshin arnaıy zań jumys istemek.

«Ǵylymı jáne (nemese) ǵylymı-tehnıkalyq qyzmet nátıjelerin komersıalandyrý týraly» Qazaqstan respýblıkasynyń zańyn tanystyrǵan depýtat budan bylaı ǵylymǵa bólinetin qarjy bosqa ketpeıtindigine senimdi. Óıtkeni, ǵylymdy komersıalandyrý zań arqyly rettelip, bólingen qarjynyń suraýy da bolady. Sonyń nátıjesinde ǵylym men óndiristiń baılanysy kúsheıýi tıis. Depýtattardyń jańa zańnan kútip otyrǵan úmiti de osy.