Qazaqtyń halyq bolyp qalyptasý tarıhyna toqtalsaq, tuńǵıyq tereńge tireletinimiz haq. Topyraǵynda taýarıh tolqyp,shejirege bókken baǵzy dalasy sumpaıy soǵystan, mereıli jeńis, márt batyrlardan kende bolǵan emes. Qaıyspas qara narlardyń qaısarlyǵynyń arqasynda kelgen jeńistiń jemisin búgingi urpaq biz kórýdemiz. Ulan-ǵaıyr atyrapty Alashtyń abadandary atanǵan, alamannyń aldyn bermegen asyl erler qankeshý soǵysta jankeshti erliktiń qasabynda júrip, búgingi qoı ústine boztorǵaı jumyrtqalaǵan beıbitshilik zamannyń beınesin sol tusta qalyptastyrdy. Sondaı, el úshin eren eńbegimen eldiń esinde saqtalǵan aty máshhúr bahadúrlerimizdiń biri Er Jánibek batyrdyń bıyl 300 jyldyq mereıtoıy keń kólemde atylyp ótilmek.
Er Jánibek Berdáýletuly (1714-1792jj.) Syr boıynda týǵan. Er Jánibek qazaqtyń batyrlary: Qabanbaı, Bógenbaı, Naýryzbaı, Altybaı, Espenbet, Shóńke, Aqpantaı, Malaısary, Janataı, Ótegen, Raıymbek, Baıan tárizdi Abylaı zamanynda jońǵarlarǵa qarsy soǵysyndaǵy aıtýly tulǵalardyń biri retinde tarıhtan erekshe oryn alady. Er Jánibek týraly aıtqanda ony han Jánibek nemes Shaqshaq uly Jánibekpen shatastyrmaý kerek. Er Jánibek Kereıdiń Jántekeı rýynan shyqqan Abylaı mańyna shoǵyrlanǵan batyrlardyń biri.
Batyrdyń mereıtoıynyń tusaý keser rásimi Abaı atyndaǵy QazUPÝ-da ótip, sharaǵa «Er Jánibek» qorynyń múshesi, otstavkadaǵy general-maıor Dálel Núkeuly, jazýshy,Qytaı Halyq Memlekettik syılyǵynyń ıegeri, «Er Jánibek» romanynyń avtory Shámis Qumaruly, M.Áýezov atyndaǵy ádebıet jáne óner ınstıtýtynyń aǵa ǵylymı qyzmetkeri, aqyn Muhamadıev Dáýren, aıtysker aqyn – Qaırat Qulmuhamed, fılosofıa ǵylymdarynyń kandıdaty,túrkolog ǵalym Nápil Bazylhan qatysyp,quttyqtaý sózder oqylyp,tilekter aıtyldy.
Sharaǵa Qazaq Ulttyq Agrarlyq Ýnıversıtetiniń stýdentteri belsene qatysyp,alqaly jıynnyń ajaryn kirgizdi. Áýelegen ádemi áýezdiń áseri jıylǵan jurtty janyn jadyratyp, kúmbirlegen kúı kópshiliktiń kóńilin kóterdi. «Búgingi jıyn bizdiń alǵa qoıǵan maqsattarymyzdyń bir parasy ǵana deıdi», - sharany uıymdastyrýshylar. Abadan batyrdyń mereıtoıy Respýblıka kóleminde atalyp ótilmek.
Orynbasar Baqytbekuly
