ق ر مادەنيەت جانە سپورت مينيسترلىگى بريتاندىق «SUPERB FILMS CORPORATION LIMITED» كينوكومپانياسىمەن بىرىگىپ، يسا پايعامبار جايىندا ەكى دەرەكتى فيلم جانە شىڭعىس حان تۋرالى كوركەم فيلم تۇسىرمەكشى، - دەپ حابارلايدى «قامشى» پورتالى Skifnews.kz سىلتەمە جاساپ. 

كەشە مينيستر ارىستانبەك مۇحامەدي ۇلى مەن ۇلىبريتانيالىق كومپانيانىڭ باسشىسى كەنت ۆولۆين جانە قازاق عىلىمي-زەرتتەۋ مادەنيەت ينستيتۋتى اراسىندا ءۇشجاقتى كەلىسىمگە قول قويىلىپ، وسى كەلىسىم اياسىندا بىرنەشە جوبا جۇزەگە اساتىن بولدى، - دەپ جازادى باسىلىم.

اتاپ ايتقاندا، 2016 جانە 2017 جىلدارى تاراپتار بىرلەسە «We will rock you» ميۋزيكلىن ءتۇسىرۋدى جوسپارلاپ وتىر. سونىمەن قاتار، قازاقستان اۋماعىندا «شىڭعىس حان» اتاۋىمەن كوركەم فيلم جانە يسا پايعامبار جايىندا ەكى ءبولىمدى دەرەكتى فيلم تۇسىرمەكشى. سوڭعىسى ەلدەگى كونفەسسياارالىق تاتۋلىقتى نىعايتۋعا نەگىزدەلگەن دەيدى ا.مۇحامەدي ۇلى.

بۇگىندە 100-دەن استام فيلم ءتۇسىرىپ ۇلگەرگەن كەنت ۆولۆين قازاقستاندىق كينەماتوگرافياعا قىزىعۋشىلىق تانىتىپ وتىرعانىن جەتكىزدى. اتاپ ايتقاندا، كينو مامانى ءبىزدىڭ ەلدە شىڭعىس حاننىڭ جاس كەزىن باياندايتىن كوركەم ءفيلمنىڭ ءتۇسىرىلىمىن قولعا الامىن دەپ قۇلشىنىپ وتىر.

ال، بىلتىر كورەرمەنگە جول تارتۋى ءتيىس بولعان قازاق حاندىعى تۋرالى كوپسەريالى ءفيلمنىڭ تاعدىرى ءالى كۇنگە دەيىن بەلگىسىز كۇيدە. جوبا رەجيسسەرى مەن پروديۋسەرى قارجىنىڭ تاپشىلىعىنان ءتۇسىرىلىم جۇمىستارىنىڭ كەشەۋىلدەپ جاتقانىن بۇعان دەيىن ايتقان بولاتىن. ءتىپتى، ولار باق-تاردىڭ بىرىنە بەرگەن سۇحباتىندا تاريحي تۋىندىنىڭ قارىزعا ءتۇسىرىلىپ جاتقاندىعىن دا جايىپ سالدى.