ماجىلىستە پالاتا سپيكەرى نۇرلان ءنىعماتۋليننىڭ توراعالىعىمەن وتكەن جالپى وتىرىستا دەپۋتات قوجاحان جاباعييەۆ قازاقستان رەسپۋبليكاسىنىڭ پرەمەر-مينيسترى سەرىك احمەتوۆكە دەپۋتاتتىق ساۋال جولدادى.
«ۇستىمىزدەگى جىلى قازاقتىڭ حالىق كومپوزيتورى، دالا سيركىنىڭ نەگىزىن قالاۋشى، ۇلتتىق ات سپورتىنىڭ ءتۇرلى ءتاسىلىن جاڭعىرتۋشى ونەرپاز، جاۋىرىنى جەرگە تيمەگەن الىپ كۇش اتاسىنىڭ يەسى بالۋان شولاق (شىن اتى نۇرماعامبەت) بايمىرزا ۇلىنىڭ دۇنيەگە كەلگەنىنە – 150 جىل.
بالۋان شولاق – زامانىندا قازاق ءان ونەرىنىڭ تاماشا ورىنداۋشىسى، ناسيحاتشىسى بولا ءجۇرىپ، ءوزى دە ءان شىعارىپ، قازاقتىڭ انشىلىك ونەرىن وركەندەتۋگە ۇلكەن ۇلەس قوسقان كومپوزيتور. بالۋان شولاقتىڭ جيىرماعا جۋىق ءانى بولعانىمەن، بۇگىنگى كۇندە ولاردىڭ حالىق اراسىندا ناسيحاتتالۋى تومەن. اقىندىق قىرى مۇلدە زەرتەلمەگەن.
ءتىپتى، بالۋان شولاقتىڭ ءومىربايانى جونىندە دە زەرتتەۋلەر ءالى كۇنگە ناقتىلانباعان. قازاق رۋحانياتى عانا ەمەس، مادەنيەتىنىڭ دە قالىپتاسۋىندا زور ورنى بار تۇلعانىڭ دۇنيەگە كەلگەن جەرى مەن قايتىس بولعان جىلىنا قاتىستى ءارتۇرلى دەرەكتەردى ايتىپ ءجۇرمىز.
سونداي-اق، بالۋان بابامىزدىڭ ءوز ۇلتى ءۇشىن جاساعان كۇرەسكەرلىك قايراتكەرلىگىن قازىرگى ۇرپاقتىڭ بىلە بەرمەيتىنى قىنجىلتادى. ويتكەنى، بالۋان شولاقتىڭ ۇلت-ازاتتىق كوتەرىلىسىندەگى ورنى دا انىقتالماعان. ول تۋرالى ۇلتىمىزدىڭ كورنەكتى جازۋشىسى ءسابيت مۇقانوۆتىڭ «بالۋان شولاق» پوۆەسىندە جانە بەلگiلi جازۋشى، دراماتۋرگ دۋلات يسابەكوۆتىڭ "جاۋجۇرەك" اتتى تۋىندىسىندا ايتىلعانىمەن، مۇنى جەتكىلىكسىز دەپ ەسەپتەيمىز. سوندىقتان، ءالى دە اشىلماعان قىرلارى كوپ داڭقتى بالۋان، ءانشى، اقىن، حالىق كومپوزيتورى بالۋان شولاقتىڭ 150 جىلدىعىندا وسى ولقىلىقتاردىڭ ورنى تۇگەل تولىقتىرىلادى دەگەن ءۇمىتىمىز بار. ۇلت تاريحى ءۇشىن قىمبات ءارى قايتالانباس ءىرى تۇلعا بالۋان شولاقتىڭ ءومىربايانىن، شىعارماشىلىعىن تولىق زەرتتەپ، لايىقتى باعاسىن بەرۋ – ەلباسىنىڭ حالىققا ارناعان جولداۋىندا كورسەتىلگەن جاڭا قازاقستاندىق ءپاتريوتيزمدى قالىپتاستىرۋ مەن دامىتۋدا ۇلكەن ءرول اتقاراتىنى ءسوزسىز.
قۇرمەتتى سەرىك نىعمەت ۇلى!
ۇكىمەتتىڭ 1999 جىلعى 28 قىركۇيەكتەگى «مەرەيتويلار مەن اتاۋلى كۇندەردى مەرەكەلۋ تۋرالى» قاۋلىسىنا سايكەس بالۋان شولاق (نۇرماعامبەت) بايمىرزا ۇلىنىڭ 150 جىلدىعىنا وراي تومەندەگى ءىس-شارالاردىڭ ورىندالۋىنا ىقپال ەتۋىڭىزدى سۇرايمىز.
- الماتى قالاسىنداعى بالۋان شولاق سپورت جانە مادەنيەت سارايىنىڭ الدىنا بالۋان شولاقتىڭ ەسكەرتكىشىن ورناتۋ.
- اقمولا مەن جامبىل وبلىستارىندا بالۋان شولاقتىڭ مەرەيتويىنا وراي ءىس-شارالار وتكىزۋ.
- استانا نەمەسە الماتى قالالارىندا بالۋان شولاقتىڭ ءومىرى مەن شىعارماشىلىعىنا ارنالعان عىلىمي-تاجىريبەلىك كونفەرەنسيا ۇيىمداستىرۋ.
- قايراتكەر تۇلعا تۋرالى كوركەم جانە دەرەكتى فيلم ءتۇسىرىپ، رەسپۋبليكالىق تەلەارنالاردان بەرۋ.
كوتەرىلگەن ماسەلەگە بەلگىلەنگەن تارتىپپەن جازباشا جاۋاپ بەرۋىزدى سۇرايمىز.
26.02.2014
