ق ر اۋىلشارۋاشىلىعى مينيسترلىگىنىڭ جاۋاپتى حاتشىسى ارمان ەۆنييەۆكە ءبىر كاسىپكەر مينيسترلىك ونىڭ قىزمەتتەرىنە جۇگىنسە، قىزمەت قۇنىنىڭ 40-50 پايىزىن بەرەتىنىن ايتىپ ۇسىنىس جاساعان. بۇل تۋرالى شەنەۋنىكتىڭ ءوزى «فەيسبۋك» جەلىسىندەگى پاراقشاسىندا جاريالادى.

«40-50 پايىز. ەلگە تانىمال ءبىر ازامات ءبىزدىڭ مينيسترلىك ونىڭ كومپانياسىنىڭ قىزمەتتەرىن پايدالانۋعا كومەكتەسسەم قىزمەتتىڭ جالپى قۇنىنان وسىنشا «سىباعا» بەرەتىنىن ايتتى. وعان جاۋاپ رەتىندە كابينەتىمنەن قۋىپ شىققانىما قاتتى تاڭ قالدى. ەندى ونىمەن جەمقورلىققا قارسى ءىس-قيمىل جونىندەگى ۇلتتىق بيۋرو اينالىساتىن بولادى»، - دەپ جازعان ارمان ەۆنييەۆ جازاسىز كەتەمىن دەپ ويلايتىن الگىندەي ادامدارعا قاتتى اشۋلى ەكەنىن ايتادى.

«بۇل جاعدايعا ەشقانداي دا قۋانىش سەزىمىمنىڭ جوق ەكەنىن ءتۇسىندىرىپ جاتۋ ارتىق بولار. كەرىسىنشە، وسىنداي ويىنا كەلگەندى ىستەۋگە جانە سول ءۇشىن جاۋاپقا تارتىلماي كەتەتىنىنە سەنەتىن ادامداردىڭ قىلىعى ىزامدى كەلتىرەدى. ەكىنشى جاعىنان قاڭعىباس قايىرشىلاردى اياعانداي اياۋشىلىق تۋعىزادى. تەك قايىرشى عانا ءبىر ءتىلىم نان ءۇشىن كەز-كەلگەن جۇمىستى ىستەۋگە بار. ال، مىنا كىسىلەر ەش ويلانباستان وزدەرىنىڭ اتتارىنا كىر كەلتىرۋدە. ءبىراق، مەن ءاربىر مەملەكەتتىك قىزمەتشى ءوز سوزدەرىن ناقتى ىسپەن دالەلدەسە، ءبىز ارامىزداعى وسى قاسىرەتتى جەڭەتىنىمىزگە سەنەمىن»، - دەيدى ول.