وسى اپتادا  ەلباسى ن.نازاربايەۆ ەلىمىزدىڭ ءبىلىم ءجان عىلىم ءمينيسترىن اۋىستىردى. مۇنان بولەك، وڭتۇستىك قازاقستان وبلىسى اكىمىنىڭ جاڭا ورىنباسارى تاعايىندالىپ، وزگە دە كادرلىق ءاۋىس-تۇيىس ورىن الدى، - دەپ حابارلايدى «قامشى» پورتالى قازاقپاراتقا سىلتەمە جاساپ.

سونىمەن مەملەكەت باسشىسى نۇرسۇلتان نازاربايەۆتىڭ جارلىعىمەن ەرلان ساعادييەۆ قازاقستان رەسپۋبليكاسىنىڭ ءبىلىم جانە عىلىم ءمينيسترى قىزمەتىنە تاعايىندالدى. ەرلان كەنجەعالي ۇلى ساعادييەۆ 1966 جىلى 29 قىركۇيەكتە دۇنيەگە كەلگەن. 1990 جىلى «ەكونوميكا» ماماندىعى بويىنشا ءال-فارابي اتىنداعى قازاق ۇلتتىق ۋنيۆەرسيتەتىن ءتامامداعان، بىلىكتىلىگى ەكونوميست. 1993 جىلى ميننەسوتا شتاتىنىڭ ۋنيۆەرسيتەتىن ءبىتىردى، اقش-تىڭ ميننەاپوليس قالاسىندا قولدانبالى ەكونوميكا دەپارتامەنتىنىڭ عىلىم ماگيسترى عىلىمي دارەجەسى بار.

ەڭبەك جولىن 1990 جىلى سىرتقى ىستەر مينيسترلىگىنىڭ قولدانبالى ەكونوميكا دەپارتامەنتىنىڭ حالىقارالىق ەكونوميكالىق قاتىناستاردى دامىتۋ جونىندەگى ەكىنشى حاتشىسى لاۋازىمىنان باستاعان. دۇنيەجۇزىلىك بانكىنىڭ اۋىل شارۋاشىلىعى دەپارتامەنتىنىڭ احۋالىن تالداۋ جونىندەگى اسسيستەنتى، شىعىس ەۋروپا، تمد ەلدەرىنىڭ كۋراتورى بولعان (اقش، ۆاشينگتون ق.). 2003 جىلدان باستاپ 2009 جىلعا دەيىن «جاڭا تەحنولوگيالار. قازاقستان» اق-نىڭ ديرەكتورلار كەڭەسىنىڭ ءتوراعاسى بولدى، باس ديرەكتوردىڭ لاۋازىمىن اتقارعان. 2012-2013 جىلدارى قازاقستان رەسپۋبليكاسى پرەمەر-مينيسترىنىڭ كەڭەسشىسى قىزمەتىن اتقارعان. 2014 جىلدىڭ اقپان ايىنان تامىز ايىنا دەيىن قازاقستان رەسپۋبليكاسىنىڭ يندۋستريا جانە جاڭا تەحنولوگيالار ۆيسە-مينيسترى بولدى. 2014 جىلدىڭ تامىز ايىندا ق ر ينۆەستيسيالار جانە دامۋ ءمينيسترىنىڭ ورىنباسارى بولىپ تاعايىندالدى. ەلىمىزدەگى حالىقارالىق IT ۋنيۆەرسيتەتى مەن حالىقارالىق بيزنەس ۋنيۆەرسيتەتىنىڭ نەگىزىن قالاعان.

ال بۇرىنعى ق ر ءبىلىم جانە عىلىم  ءمينيسترى اسلان باكەن ۇلى ءسارىنجىپوۆ «نازاربايەۆ قورىنىڭ» پرەزيدەنتى جانە «Nazarbayev University» قامقورلىق كەڭەسىنىڭ مۇشەسى بولىپ تاعايىندالدى. اسلان ءسارىنجىپوۆ قازاق مەملەكەتتىك ەكونوميكالىق ۋنيۆەرسيتەتىن، وكلاحوما ۋنيۆەرسيتەتىن، ۆەنا ديپلوماتيالىق اكادەمياسىن اياقتادى. ءار جىلدارى «ۇكىمەت جانىنداعى ۇلتتىق تالداۋ ورتالىعى» اق باسقارماسى  جانە ق ر ۇلتتىق بانكى ءتوراعاسىنىڭ ورىنباسارى لاۋازىمدارىن اتقاردى. ەكونوميكالىق دامۋ، قارجى، ءبىلىم بەرۋ ماسەلەلەرىنە جەتەكشىلىك ەتتى. «نازاربايەۆ ۋنيۆەرسيتەتى» اۆتونوميالىق ءبىلىم بەرۋ ۇيىمىنىڭ اتقارۋشى كەڭەسىنىڭ ءتوراعاسى بولدى. 2013 جىلعى 2 قىركۇيەكتەن 2016 جىلعى 10 اقپان ارالىعىندا ق ر ءبىلىم جانە عىلىم ءمينيسترى بولدى.

قازاقستان رەسپۋبليكاسى پرەزيدەنتى اكىمشىلىگىنىڭ كەلىسىمىمەن ءوڭىر باسشىسىنىڭ وكىمىمەن وڭتۇستىك قازاقستان وبلىسى اكىمىنىڭ ورىنباسارى لاۋازىمىنا ۇلاسبەك سادىبەك ۇلى سادىبەكوۆ تاعايىندالدى. ۇ.بايدىبەك اۋدانى جامبىل اۋىلىندا 1967 جىلى دۇنيەگە كەلگەن. ءبىلىمى جوعارى، ماماندىعى بويىنشا ينجەنەر-ەلەكتريك، حالىقارالىق ەكونوميست. ەڭبەك جولىن 1983 جىلى العاباس اۋداندىق مال بورداقىلاۋ بىرلەستىگىنىڭ جۇمىسشىسى بولىپ باستاعان. 1992-2015 جىلدارى العاباس اۋدانى اكىمشىلىگى ىشكى ساياسات ءبولىمىنىڭ مامانى، باس مامانى، جاستار ءىسى، ساياحات جانە سپورت باسقارماسىنىڭ باستىعى، شىمكەنت قالاسى «جەتىگەن» ج ش س ديرەكتورى، وڭتۇستىك قازاقستان وبلىسى بايدىبەك اۋدانى اكىمىنىڭ ورىنباسارى، وبلىس اكىمى اپپاراتى الەۋمەتتىك-مادەني كەشەنى ءبولىمىنىڭ مەڭگەرۋشىسى، وڭتۇستىك قازاقستان وبلىسى جاستار ءىسى جانە ىشكى ساياسات دەپارتامەنتىنىڭ باستىعى، وڭتۇستىك قازاقستان وبلىسى ىشكى ساياسات دەپارتامەنتىنىڭ ديرەكتورى، وڭتۇستىك قازاقستان وبلىسى بايدىبەك، سارىاعاش اۋداندارىنىڭ اكىمى، «نۇر وتان» حدپ-نىڭ وڭتۇستىك قازاقستان وبلىستىق فيليالى ءتوراعاسىنىڭ ءبىرىنشى ورىنباسارى قىزمەتتەرىن اتقاردى. 2012 جىلعى قاڭتار ايىنان باستاپ قازاقستان رەسپۋبليكاسى پارلامەنتى ءماجىلىسىنىڭ دەپۋتاتى بولعان.

اسەت يرعالييەۆ ق ر ۇەم «ەكونوميكالىق زەرتتەۋلەر ينستيتۋتى» اق ديرەكتورلار كەڭەسىنىڭ شەشىمىمەن ق ر ۇەم «ەكونوميكالىق زەرتتەۋلەر ينستيتۋتى» اق باسقارما ءتوراعاسى بولىپ تاعايىندالدى. اسەت يرعالييەۆ قازاقستاندىق مەنەدجمەنت، ەكونوميكا جانە بولجامداۋ  ينستيتۋتىنىڭ  (كيمەپ)  مەملەكەتتىك ساياسات ەكونوميكا سالاسىندا باكالاۆر  دارەجەسىندە  ۇزدىك ءتامامدادى  (الماتى، قازاقستان).  حالىقارالىق يونكوپينگ بيزنەس مەكتەبىن  حالىقارالىق ەكونوميكا سالاسىندا عىلىم باكالاۆرى دارەجەسىمەن (Jönköping University، شۆەسيا)، يورك ۋنيۆەرسيتەتىن ەكونوميكاداعى عىلىم ماگيسترى دارەجەسىمەن (University of York، ۇلىبريتانيا)،   نوتتينگەم ۋنيۆەرسيتەتىن ەكونوميكاداعى فيلوسوفيا ماگيسترى دارەجەسىمەن  (The University of Nottingham، ۇلىبريتانيا) اياقتادى. اسەت يرعالييەۆ لوندون ەكونوميكا جانە ساياسي عىلىمدار مەكتەبىنىڭ PhD دوكتورى دارەجەسىن يەمدەنگەن (لوندون، ۇلىبريتانيا). ەڭبەك جولىن لوندونداعى ەۋروپالىق دامۋ جانە قايتا قۇرۋ بانكىنىڭ (ەدقب) شىعىس ەۋروپا، كاۆكاز جانە ورتالىق ازيا بويىنشا ەكونوميكا دەپارتامەنتىنىڭ اۋماقتىق ەكونوميسى رەتىندە باستاعان. 2014 جىلدىڭ ماۋسىم ايىنان باستاپ ق ر ۇەم «ەكونوميكالىق زەرتتەۋلەر ينستيتۋتى» اق باسقارما ءتوراعاسىنىڭ ورىنباسارى لاۋازىمىندا قىزمەت اتقاردى. «ەكونوميكالىق زەرتتەۋلەر ينستيتۋتى» اق بۇدان بۇرىن باسقارعان ماقسات مۇحانوۆ ينستيتۋتتىڭ باس ەكونوميست لاۋازىمىنا تاعايىندالدى.

اتىراۋ وبلىسىندا ءوڭىر باسشىسىنىڭ وكىمىمەن وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باستىعى قىزمەتىنە ەركىن شپانوۆ تاعايىندالدى. ول وسى تاعايىنداۋعا دەيىن ق ر پارلامەنتى ءماجىلىسىنىڭ دەپۋتاتى بولدى. ە.شپانوۆ 52 جاستا. دەپۋتاتتىق قىزمەتىنەن بۇرىن دا ول وسى باسقارماعا باسشىلىق ەتكەن ەدى.

قازاقستان قور بيرجاسى (KASE) اكسيونەرلەرىنىڭ كەزەكتەن تىس جالپى جينالىسىنىڭ 2016 جىلدىڭ 11 اقپانىنداعى شەشىمىمەن «قازاقستاننىڭ حالىق جيناق بانكى» اق-نىڭ باسقارما ءتوراعاسىنىڭ ورىنباسارى ەرتاي يسمايىل ۇلى ءسالىموۆ KASE ديرەكتورلار كەڭەسىنىڭ مۇشەسى - KASE تاۋەلسىز ديرەكتورى بولىپ سايلاندى. بيرجانىڭ جاڭا تاۋەلسىز ديرەكتورىنىڭ كەزەكتەن تىس سايلاۋى ج.ب.قۇرمانوۆتىڭ KASE ديرەكتورلار كەڭەسىنىڭ مۇشەسى - KASE تاۋەلسىز ديرەكتورى رەتىندە وكىلەتتىگى باسقا جۇمىسقا اۋىسۋىنا بايلانىستى مەرزىمىنەن بۇرىن توقتاتىلعاندىقتان وتكىزىلدى. 

دانيار مەيىرحان شىمكەنت قالاسىنداعى مۋنيسيپالدىق پوليسيانىڭ باسشىسى قىزمەتىنە تاعايىندالدى. ول ىشكى ىستەر ورگاندارىنداعى قىزمەتىن 2003 جىلى جەدەل قىزمەتتەن باستاعان. ودان كەيىن اقتوبە وبلىسىنان وڭتۇستىك قازاقستان وبلىستىق ىشكى ىستەر دەپارتامەنتىنە قىزمەتكە اۋىسقان. وسى جىلدارى وبلىستىڭ جول پوليسياسى باسقارماسىندا قىزمەت اتقارىپ، ايماقتاعى ەسىرتكى بيزنەسىنە قارسى كۇرەس باسقارماسىن، شىمكەنت ىشكى ىستەر باسقارماسىن باسقارعان. جەرگىلىكتى پوليسيانىڭ باستىعى قىزمەتىنە سايرام اۋداندىق ءىىب-نىڭ باسشىسى قىزمەتىنەن اۋىسقان.