بۇگىن ەلباسى 7 مىڭ ادامدىق مەشىت قۇرىلىسىنىڭ جوباسىمەن تانىستى، سونداي-اق قالاداعى ءدىني كونفەسسيا جانە زيالى قاۋىممەن كەزدەستى، - دەپ حابارلايدى «قامشى» پورتالى قمدب سايتىنا سىلتەمە جاساپ.

مەملەكەت باسشىسىن قۇرىلىس الاڭىندا باس ءمۇفتي ەرجان قاجى مالعاجى ۇلى، الماتى قالاسىنىڭ اكىمى باۋىرجان بايبەك، سونىمەن قاتار، شاراعا نايب ءمۇفتي سەرىكباي قاجى وراز، الماتى قالاسىنىڭ باس يمامى نۇربەك ەسماعانبەت، باس ارحيتەكتور جارىلعاپ قازىبەك جانە شىعارماشىلىق يەلەرى قارسى الدى.

الاتاۋ اۋدانىنداعى قۇرىلىسى جوسپارلانعان عيماراتتىڭ جالپى الاڭى - 16 مىڭ شارشى مەتر. ارحيتەكتۋرالىق جوباعا سايكەس، مەشىتتە بيىكتىگى 75 مەترلىك بىرنەشە مۇنارا بولادى. كەشەننىڭ ورتالىق بولىگىندە 9 كۇمبەزدى نەگىزگى عيمارات ورنالاسادى. سونداي-اق ونىڭ قۇرامىنا يسلام كىتاپحاناسى، اكىمشىلىك بولىك، ناماز وقيتىن زالى بار ايەلدەر كورپۋسى، ءدىني راسىمدەر وتكىزۋگە ارنالعان زال، وقۋ-اعارتۋ توپتارىنا ارنالعان جانە مەدرەسە سىنىپتارى بار ەرلەر بولىگى، سونداي-اق شەبەرحانا مەن دۇكەندەر كىرەدى.