استانادا جاۋىزدىقپەن ولتىرىلگەن ستۋدەنت ەراسىل اۋباكىروۆتىڭ سۇيىكتىسى ايگەرىم ءابسادىقوۆا Tengrinews.kz تىلشىسىنە سۇحبات بەردى، - دەپ حابارلايدى «قامشى» پورتالى.

 ايگەرىم ءابسادىقوۆا ەراسىلدىڭ ءاردايىم ۇيلەنۋ تۋرالى ايتاتىنىن ەسكە الدى. ونىڭ ايتۋىنشا، ولار وسكەمەندەگى مەكتەپتە ءبىرىنشى سىنىپتان باستاپ تانىس كورىنەدى.  

"مەكتەپتە ءبىز ارالاسىپ تۇراتىنبىز. توعىزىنشى سىنىپتان باستاپ ماعان كوڭىلىن ءبىلدىرىپ ءجۇردى، ءبىراق كەزدەسىپ جۇرمەگەن ەدىك. (...) سوسىن مەن الماتىعا وقۋعا كەتتىم. الماتىداعى ەنەرگەتيكا جانە بايلانىس ۋنيۆەرسيتەتىندە وقىدىم. ءبىز حات الماسىپ تۇردىق. مەن 2014 جىلى وقۋ ءبىتىرىپ، سول جىلى استاناعا كوشىپ باردىم. سوسىن ءبىز جاقىن ارالاسا باستادىق. ول ءاردايىم قاسىمنان تابىلاتىن. ماعان دەگەن ەرەكشە نازارىن سەزەتىنمىن. ول ءارقاشان "ءبىز بىرگە بولۋىمىز كەرەك" دەيتىن. مەن باستاپقى كەزدە نازار اۋدارماي ءجۇردىم. ول ودان دا تىعىز قارىم-قاتىناستا بولعىسى كەلەتىنىن ايتاتىن. وعان دەيىن ءبارى ءازىل رەتىندە بولاتىن، دوس بولىپ، كەزدەسىپ جۇردىك. مەن وعان وسىعان بايلانىستى جاقسىلاپ سويلەسەيىك دەدىم. ول جازدا ۇيلەنگىسى كەلەتىنىن، سوندىقتان تىعىز قارىم-قاتىناستا بولعىسى كەلەتىنىن ايتتى. مۇمكىن مەن دە ارمانداپ كەتكەن شىعارمىن. 4 اقپاندا، بەيسەنبى كۇنى ءبىز كەزدەسۋىمىز كەرەك ەدى، ال جۇما كۇنى سىنىپتاستارىمىزبەن كەزدەسەمىز دەپ كەلىسكەنبىز. ەگەر بەيسەنبى كۇنى سويلەسسەك، ارامىزداعى جاعدايدى سىنىپتاستارىمىزعا جۇما كۇنى ايتاتىن شىعارمىز دەپ ويلادىم"، - دەيدى ايگەرىم. 

قىزدىڭ ايتۋىنشا، ەراسىل جاڭا جىلدان كەيىن ۇيلەنۋ تۋرالى كوپ ايتا باستايدى. 

"ول ماعان ۇنايتىن. ءبىز سىنىپتاستارىمىزعا ايتپادىق، سۋرەتتەرىمىزدى دە جاسىردىق. ءبىراق سىنىپتاستارىمىز سەزەتىن. قاراشادا مەنىڭ تۋعان كۇنىم بولدى، ءبىز كاراوكەدە بولدىق، ول ءاندى جاقسى ايتاتىن، ماعان ءان دە ارنادى. (...) مەن اپكەسىمەن، اناسىمەن سويلەسكەنمىن، ءبىر كەلگەنىندە اناسى ۇيلەرىندە اڭگىمە بولعانىن، جانۇيالارىنىڭ قارسى ەمەس ەكەندەرىن ايتقان ەدى. اپكەسى بولسا "سەندەردى جازدا ۇيلەندىرەمىز دەپ ويلادىم" دەپ ايتقان. اناسى دا كەلگەندە "ونى تابامىز، بىرگە ءومىر سۇرەسىڭدەر" دەدى. مەن ءتىپتى بۇل قارىم-قاتىناسىمىزدى سيپاتتاپ تا بەرە المايمىن. (...) ارالاسىپ تۇردىق، دوس بولدىق. دوستارىمىز كەزدەسەسىڭدەر مە دەپ تە سۇرايتىن"، - دەيدى ايگەرىم ءابسادىقوۆا. 

ال كىسى ءولتىرۋ ىسىنە بايلانىستى ۇستالعانداردى بىلەسىڭ بە دەگەن سۇراققا ايگەرىم "ولاردى ءتىپتى دە تانىمايمىن. وقيعاعا قاتىسى بار ادامداردىڭ كىم ەكەنىن سۇراستىرعانىمدا دا دوستارى بىلمەيتىن بولىپ شىقتى. ءوزىم دە ولار تۋرالى ءبىرىنشى رەت ەستىدىم" دەپ جاۋاپ بەردى. 

"جوعالىپ كەتەر الدىندا ول "قايىرلى تاڭ، نە ىستەپ جاتسىڭ؟" دەپ جازعان ەدى، ءوزىنىڭ نە ىستەپ جۇرگەنىن ايتىپ وتىراتىن. سول كۇنى ولاردا ۋنيۆەرسيتەتتە جينالىس بولدى. وسىدان كەيىن جازباي قالدى. بەيسەنبى كۇنى دوستارى ماعان حابارلاسىپ، ونى مەنەن سۇرادى. ال وزىمەن بىرگە تۇرعان دوسى ۇيدە ونىڭ تۇنەمەگەنىن ايتتى. ال ەراسىل وقۋدى ءبىرىنشى ورىنعا قوياتىن ادام. ءوزى دە "بەيسەنبى كۇنى ەمتيحان تاپسىرامىن" دەپ ايتقان. ول تاڭعى بەستە تۇرىپ، ساباعىنا دايىندالاتىن. بەيسەنبى كۇنى دوستارىمەن بىرگە ونى ىزدەي باستادىق. ەرىكتىلەر دە، باسقا دوستارى دا ىزدەستىرۋگە قوسىلدى. ءۇمىتىمىزدى ۇزبەدىك. ونىڭ ەندى جوق ەكەنىنە ءالى كۇنگە سەنە المايمىن. ول ءوز ۇيىندە جۇرگەندەي سەزىنەمىن. ءبىز وسكەمەنگە جەرلەۋىنە بارىپ كەلدىك"، - دەپ ءتۇسىندىردى ايگەرىم. 

ول الەۋمەتتىك جەلىلەردە تارالىپ جاتقان ۆيدەولارعا سەنبەيتىنىن دە ايتىپ بەردى. 

"5 اقپاندا ءبىز پوليسيانى شاقىرتتىق، ول ەڭ سوڭعىلاردىڭ ءبىرى بولىپ ماعان تەلەفون شالىپتى. مەنەن پوليسەيلەر كىم ەكەنىمدى، سوڭعى رەت قاشان كەزدەسكەنىمىزدى سۇراپ، جاۋاپ الدى. مەن استاناعا دۇيسەنبى كۇنى ورالدىم، ءبىراق كەشە جۇمىسقا شىعا المادىم. سوڭعى كەزدەرى ۇيىقتاي الماي ءجۇرمىن. سەنە الار ەمەسپىن. قارىزى دا، پروبلەمالارى جا جوق ەدى. ول پىسىق ەدى. ءان ايتاتىن. ەشقاشان مۇڭ-رەنىشىن ايتپايتىن"، - دەيدى قىز. 

23 جاستاعى ەراسىل اۋباكىروۆتىڭ دەنەسى 10 اقپاندا جەدەل-ىزدەستىرۋ جۇمىستارىنىڭ بارىسىندا تابىلدى. قىلمىس جاسادى دەگەن كۇدىكپەن ءتورت ادام ۇستالدى. ولار ايان مەيىربايەۆ، اندرەي تيحونەنكو، ۆيتاليي شەرستەنيەۆ جانە نۇربەك اجىمبەي. ەراسىل اۋباكىروۆ ەلورداداعى جوعارى وقۋ ورنىنىڭ التىنشى كۋرسىندا وقىدى. 3 اقپاندا ۇيىنەن شىعىپ كەتىپ، قايتا ورالمادى. كەلەسى كۇنى دوستارى ونىڭ جوعالىپ كەتكەنىن حابارلادى. اۋباكىروۆ ينتەرن-حيرۋرگ بولعان. ستۋدەنتتىڭ دوستارى ونىڭ ۇزدىك وقىعانىن، بەلسەندى بولىپ، قاتارلاستارىمەن جاقسى قارىم-قاتىناستا بولعانىن اتاپ ءوتتى.