ىشكى ىستەر ءمينيسترى قالمۇحانبەت قاسىموۆ تاراز قالاسىنىڭ ىرگەسىندەگى بۋرىل اۋىلىنداعى جاعدايعا قاتىستى پىكىر ءبىلدىردى، - دەپ حابارلايدى «قامشى» پورتالى.

"ءقازىر جاعداي قالپىنا كەلتىرىلدى. مەنىڭشە، دياسپورالار مەن جەرگىلىكتى بيلىك ءتۇسىندىرۋ جۇمىستارىن جۇرگىزدى، اكىمدىك پەن قۇقىق قورعاۋ ورگاندارى شارا قولدانىپ جاتىر. قازىرگى ۋاقىتتا جاعداي تۇراقتاندى. بىزدە ۇلتتىق ۇلانىمىز بار، ول كۇشەيتىلگەن نۇسقاعا ءوتتى. كۇدىكتىگە كۇزەت قويىلدى. بۇگىن ونى قاماۋ تۋرالى ماسەلە شەشىلەدى. (...) بارلىعى باقىلاۋدا، ول جاقتا ەشقانداي دا رەجيم ەنگىزگەن جوقپىز"، - دەپ مالىمدەدى مينيستر قالمۇحانبەت قاسىموۆ. 

سونىمەن قاتار، اۋىلدا جاۋىنگەرلىك قىزمەت اتقارىپ جاتقان اسكەريلەر - ۇلتتىق ۇلان جاۋىنگەرلەرىنىڭ قىزمەتىنە قاتىستى دا جاۋاپ بەردى. ونىڭ ايتۋىنشا، اسكەريلەر اۋىلدا ءالى 1-2 كۇن بولادى. 

"مەنىڭشە، بۇل جەتكىلىكتى"، - دەپ ءتۇسىندىردى مينيستر.

"بۇل تۇرمىستىق قىلمىس، مەنىڭشە. قىلمىسكەر كىناسىن مويىنداپ وتىر، بارلىق ساراپتامانى وتكىزگەندە تەرگەۋ قيىن بولمايدى دەپ ويلايمىن، ءبىز ءىستى سوتقا جىلدام جىبەرەمىز"، - دەدى ول.

مينيستر بۇل جاعدايدا ۇلتتىق ارازدىقتىڭ جوقتىعىن اتاپ ءوتتى. "ونىڭ ۇستىنە بۇل وسى ىستە جوق. مەن وسىنى مالىمدەيمىن"، - دەپ قورىتىندىلادى ءىىم باسشىسى.

ەستەرىڭىزگە سالساق، د. كاۆازوگلى دەگەن ازامات كورشىسىنىڭ ۇيىنە ۇرلىققا ءتۇسىپ، ۇيدە ويناپ جۇرگەن 6 جاسار بالانى 11 جەردەن پىشاق ساپ ولتىرگەن. كۇدىكتى دەرەۋ ۇستالىپ، كىناسىن مويىنداعان. وقيعادان سوڭ اۋىل تۇرعىندارى بۇل جاعدايعا نارازىلىق ءبىلدىرىپ، د. كاۆازوگلىنىڭ وتباسى اۋىلدان كوشىرىلسىن دەگەن تالاپ قويدى. نارازالىق بىلدىرگەندەردىڭ بىرنەشەۋىن پوليسيا ۇستاپ اكەتكەن. سول ۇستالعانداردىڭ بوساتىلۋىن تالاپ ەتكەن اۋىل تۇرعىندارى كەشە تاعى نارازىلىق ءبىلدىردى.

وقيعا ورنىندا جۇرگەن ازاتتىق راديوسىنىڭ تىلشىلىسىنەن وزدەرىن "رەسمي ورگانداردىڭ وكىلىمىز" دەپ تانىستىرعان بىرەۋلەر پلانشەتىن تارتىپ العان. 

ەسكەرتۋ: فوتو مەن ۆيدەولار ازاتتىق سايتىنان الىندى.