جامبىل وبلىسىنىڭ بۋرىل اۋىلىندا جاعداي قالىپقا ءتۇسىپ، اۋىل سىرتىنا قويىلعان قورشاۋ الىندى، -  دەپ حابارلايدى «قامشى» پورتالى ازاتتىققا سىلتەمە جاساپ.

اۋىلعا كىرىپ-شىعۋ ەركىن، ءبىراق كىرگەندەردى تەكسەرىپ جاتىر. ءار كوشەنىڭ باسىندا پوليسەيلەر ءجۇر. اۋىل ورتالىعىندا دا پوليسەيلەر مەن جول پوليسەيلەرى ءجۇر.   

ازاتتىق ءتىلشىسى حالىقتىڭ تولقۋىنا سەبەپ بولعان "التى جاسار بالانى ءولتىردى" دەگەن كۇدىكتى ەتنيكالىق تۇرىك ازاماتىنىڭ ءۇيىنىڭ كوشىپ كەتكەنىن بايقادى. ءۇي بوس تۇر، تەرەزەلەرى سىنىپ، قورشاۋى قيسايعان. ءۇي ماڭى مەن اۋلاسىندا پوليسەيلەر ءجۇر.

جامبىل وبلىسى بايزاق اۋدانى بۋرىل اۋىلىندا 17 اقپاندا كەشكە قاراي جۇزدەگەن ادام جينالىپ، وسىنىڭ الدىندا بولعان تولقۋ كەزىندە قامالعان ازاماتتاردى بوساتۋدى تالاپ ەتكەن. بۋرىل تۇرعىندارىنىڭ تولقۋىنا وسى اۋىلدا كىشكەنتاي ۇل بالانىڭ كىسى قولىنان قازا تابۋى تۇرتكى بولعان. كەيىن قاستاندىق جاساۋشى كۇدىكتىنىڭ ەتنيكالىق تۇرىك ەكەنى حابارلاندى. اۋىل حالقىنىڭ باسىم كوپشىلىگى - قازاقتار. 17 اقپاندا بۋرىلدى ارنايى اسكەر قورشاۋعا العان ەدى.

بۇگىن ىشكى ىستەر ءمينيسترى قالمۇحانبەت قاسىموۆ تا بۋرىلداعى جاعدايدىڭ قالىپقا تۇسكەنىن مالىمدەگەن. ونىڭ سوزىنشە، جەرگىلىكتى بيلىك پەن دياسپورا وكىلدەرى حالىق اراسىندا ءتۇسىندىرۋ جۇمىستارىن جۇرگىزىپ، قۇقىق قورعاۋ ورگاندارى جاعدايدى باقىلاۋعا العان. قاسىموۆ بۇعان قوسا بۇگىن كۇدىكتىنى قاماۋ ماسەلەسى شەشىلەتىنىن ايتتى.