ءال-فارابي اتىنداعى قازاق ۇلتتىق ۋنيۆەرسيتەتىنىڭ باسشىلىعى ديپلوماتيالىق وكىلەتتىلىگى اياقتالعان جاپونيانىڭ قازاقستانداعى توتەنشە جانە وكىلەتتى ەلشىسى كاموحارا ماساوسيمەن كەزدەستى، - دەپ حابارلايدى «قامشى» پورتالى.
ەلشى قازۇۋ مەن جاپون ۋنيۆەرسيتەتتەرى اراسىندا عىلىم مەن ءبىلىم سالاسىندا تىعىز قارىم-قاتىناس ورناتۋعا تىكەلەي ءوزى اتسالىسقان.. ناتيجەسىندە ەكى جاقتى كەلىسىمدەر، بىرلەسكەن جاڭا جوبالار جۇزەگە اسىپ، جاڭا ارىپتەستەر پايدا بولدى. سولاردىڭ ءبىرى حالىقارالىق ماگاتە جەلىسى بويىنشا «يادرولىق رەاكسيالاردىڭ كومپيۋتەرلىك اقپاراتتىق بازاسىن قۇرۋ مەن دايىنداۋ». «تاعىلىمداما كەزىندە جوبانى ىسكە اسىرۋشىلار حوككايدو ۋنيۆەرسيتەتىنىڭ اقپاراتتىق بازاسىمەن، WebbleWorld باعدارلامالىق قامتاماسىز ەتۋ ورتالىعىمەن جانە توكيودا (RIKEN) فيزيكو-حيميالىق زەرتتەۋلەر ينستيتۋتىندا تاجىريبەلىك ورناتقىششتارمەن دە جۇمىس جاسالدى. ۇلتتىق كادرلار دايىندالدى. توكيو ۋنيۆەرسيتەتىندە عىلىمي دايىندىقتان وتكەن بەس ماگيسترانت قازاقستاندىق العاشقى نانو-سپۋتنيكتىڭ جوباسىن جاساپ، قۇراستىرىپ، ۇشىرعان بولاتىن»، – دەپ اتاپ ءوتتى قازۇۋ رەكتورى عالىم مۇتانوۆ.
ەكى جاق تا ارىپتەستىكتىڭ دامۋ قارقىنىنا ريزاشىلىقتارىن ءبىلدىردى. كاموحارا ءماساوسيدىڭ ايتۋىنشا، قازۇۋ-دا ءبىلىم الىپ جاتقان جاپون ستۋدەنتتەرى قازاقستانداعى ومىرلەرىنە رازى، سوندىقتان ولار مۇندا مۇمكىندىگىنشە ءجيى كەلۋگە تىرىسادى. ەلشى مىرزا اتاپ وتكەنىندەي بۇل ول ءۇشىن قۋانتارلىق جايت. «وتكەن جىلى جاپونيا پرەمەر-مينيسترىنىڭ قازاقستانعا جاساعان ساپارى مەن پرەزيدەنت ن.نازاربايەۆپەن كەزدەسۋى ەكى ەل اراسىنداعى بىرلەسكەن جوبالاردىڭ دامۋىنا سەرپىن بەردى»، – دەدى ەلشى.
كەزدەسۋ بارىسىندا ىنتىماقتاستىق ماسەلەلەرى كوتەرىلىپ، بىرلەسىپ ازىرلەنگەن جوبا ناتيجەلەرى ايتىلدى. سولاردىڭ ءبىرى. جاپونيانىڭ قازاقستانداعى ەلشىلىگىنىڭ قولداۋىمەن ۇيىمداستىرىلعان جاپون ءتىلى بايقاۋى. Japan Foundation قورىمەن دە قىرۋار جۇمىستار اتقارىلۋدا. سونىمەن قاتار، مادەني ارالىق ديالوگ اياسىندا ۆاسەدا ۋنيۆەرسيتەتىنىڭ ستۋدەنتتەرى 16 رەت قازۇۋ-عا كەلدى. كەلگەن ۋنيۆەرسيتەت ستۋدەنتتەرى قاتارىندا جاپوندىقتارمەن قاتار ءباا جانە جۇڭگو ازاماتتارى دا بار.
ايتا كەتەرلىگى، قازۇۋ عالىمدارى جاپون ۋنيۆەرسيتەتتەرىمەن بەريلل شاعىلدىرعىشتارىنىڭ قاسيەتتەرىن زەرتتەۋمەن جانە ونى يادرولىق ەنەرگەتيكادا پايدالانۋ ءۇشىن ەسەپتىك كورسەتكىشتەرىن انىقتاۋدىڭ عىلىمي جۇمىستارىن اتقاردى. باسقا جوبا اياسىندا جوعارى تەمپەراتۋرالى سۋ بۋىندا گرافيتتىڭ توتىعۋى (جوعارى تەمپەراتۋرالى سالقىنداتقىش گازدى رەاكتور) زەرتتەلدى.
كەزدەسۋدى ەكى جاق تا ىنتىماقتاستىقتىڭ الداعى ۋاقىتتاعى جوسپارلارىمەن قورىتىندىلادى. ءال-فارابي اتىنداعى قازۇۋ رەكتورى عالىم مۇتانوۆ ەكى جاقتى ەڭبەكتىڭ ناتيجەسىن وسىدان ءۇش جىل بۇرىن ءال-فارابي كىتاپحاناسى الدىندا ءوز قولىمەن وتىرعىزعان ساكۋرا اعاشىمەن سالىستىردى. بۇل وقيعا ەندىگى كۇن شىعىس ەلىنىڭ ەلشىلىگى مەن رەسپۋبليكامىزدىڭ ۇزدىك جوعارى وقۋ ورنى اراسىنداعى دوستىق پەن ارىپتەستىك قارىم- قاتىناسىنىڭ سيمۆولىنا اينالدى.
پىكىر قالدىرۋ