موڭعوليا رەسپۋبليكاسىنىڭ پرەزيدەنتى ساحياگايين ەلبەگدورج ءوزىنىڭ بەس بالاسىنان بولەك 23 بالانى باعىپ وتىر، - دەپ حابارلايدى «قامشى» پورتالى pikabu.ru – عا سىلتەمە جاساپ.

اقپارات قۇرالدارى موڭعوليا پرەزيدەنتى مەملەكەت باسشىلارىنىڭ ىشىندەگى كوپ بالالى اكە ەكەنىن جازۋدا.

لۆوۆ اسكەري ۋچيليششەسىن «اسكەري ءتىلشى» ماماندىعى بويىنشا ءتامامداعان ساحياگايين ەلبەگدورج دج. كەننەدي اتىنداعى گارۆارد مەملەكەتتىك باسقارۋ مەكتەبىنىڭ دە تۇلەگى. 1963 جىلى موڭعوليانىڭ قوبدا ايماعى زەرەگ ەلدى مەكەنىندە دۇنيەگە كەلگەن ول 75 جىل مەملەكەت باسشىلىعىندا بولعان موڭعوليا حالىق پارتياسىن تايدىرعان 1990 جىلعى بەيبىت دەموكراتيالىق توڭكەرىستىڭ سەركەسى بولدى. ءار جىلدارى ەكى مارتە موڭعوليا پرەمەر-مينيسترى، ۇلى مەملەكەتتىك حۋرال ۆيسە-سپيكەرى قىزمەتىن اتقاردى. قازىرگى لاۋازىمىنا 2009 جىلى 18 ماۋسىمدا سايلاندى.

ساحياگايين ەلبەگدورجدىڭ كەلىنشەگى حاجيدسۋرەنگيين بولورماا لۆوۆ مەملەكەتتىك ۋنيۆەرسيتەتىن، اقش-تىڭ ۆيردجينيا شتاتىندا ۇلتتىق بيزنەس جانە تەحنولوگيا كوللەدجىن ءتامامداعان. "Hope-Cancer-Free" ۇلتتىق قورىنىڭ نەگىزىن ءقالاۋشى ءارى ءتوراعاسى.

موڭعوليا – پارلامەنتتىك باسقارۋ جۇيەسىنە يە رەسپۋبليكا. زاڭ شىعارۋشى ورگانى 76 دەپۋتاتتان تۇراتىن ۇلى مەملەكەتتىك حۋرال اتالادى. ول ۇكىمەتتى جاساقتاۋدا دا شەشۋشى رولگە يە.