اتىراۋلىق ازاماتتىق بەلسەندىلەر قالا اكىمىنىڭ اتىنا الەۋمەتتىك جەلىلەردە كەڭىنەن تالقىلانىپ جاتقان اۋىلشارۋاشىلىق جەرلەرىنىڭ ساتىلۋىنا قاتىستى ماسەلەنى حالىقپەن اقىلداسۋ ءۇشىن ميتينگ وتكىزۋگە رۇقسات سۇراعان ءوتىنىش بەردى، - دەپ حابارلايدى «قامشى» پورتالى ازاتتىققا سىلتەمە جاساپ.

رۇقسات ەتىلگەن جاعدايدا ميتينگ اتىراۋ قالاسىنىڭ يساتاي ماحامبەت اتىنداعى ورتالىق الاڭىندا 24 ءساۋىر كۇنى ساعات 14.00-دە وتەدى دەپ جوسپارلانعان.

ميتينگىنى ۇيىمداستىرۋشىلاردىڭ ءبىرى بەلسەندى ماكس بوقايەۆتىڭ ايتۋىنشا، نارازىلاردىڭ باستى ماقساتى – «قازاقستان جەر كودەكسىندەگى كەمشىلىكتەر مەن قاراما قايشىلىقتاردى تۇبەگەيلى جويۋ ءۇشىن حالىقتىڭ قولداۋىن تابۋ».

– قازاقستاندا بوس جاتقان جەر جوق. ءبىراق ولار بىرەۋدىڭ يەلىگىندە. ولار (ۇكىمەت – رەد.) سونى جالعا بەرگىسى كەلەدى. ءبىز ونى (قانداي بوس جاتقان جەر تەلىمدەرىنىڭ ينۆەستورلارعا بەرىلەتىنىن – رەد.) بىلۋگە ءتيىسپىز، – دەپ مالىمدەدى ماكس بوقايەۆ.

ازاماتتىق بەلسەندىلەر Facebook الەۋمەتتىك جەلىسى ارقىلى تاراتقان حابارلامالارىندا جەردى شەتەلدىكتەرگە ساتقىزباۋعا شاقىردى.

14 ساۋىردە اۋىلشارۋاشىلىق ءمينيسترى اسىلجان مامىتبەكوۆ زاڭعا سايكەس جەردى تەك قازاقستان ازاماتتارى مەن جەرگىلىكتى كومپانيالارعا ساتۋعا بولاتىنىن ايتقان.

قازاقستانداعى جەرگە قاتىستى حالىقتىڭ الاڭداۋشىلىعى ناۋرىزدىڭ سوڭىنداعى ۇلتتىق ەكونوميكا ءمينيسترى ەربولات دوسايەۆ شىلدەنىڭ 1-ىنەن باستاپ اۋىل شارۋاشىلىعى جەرلەرىنىڭ اۋكسيون ارقىلى ساتىلاتىنى تۋرالى مالىمدەمەسىنەن سوڭ ۇدەپ كەتكەن. ۇكىمەتتىڭ جوسپارى بويىنشا جەردى جالعا الىپ پايدالانىپ جاتقاندارعا جەرىن كاداسترلىق باعاسىنىڭ 50 پايىزى شاماسىنا تەڭ باعاعا، 10 جىلعا ءبولىپ تولەۋ شارتىمەن ساتۋ قاراستىرىلعان.