وقۋشىلار ءبىتىرۋ كەشىنە ارناپ جيعان اقشالارىن اۋىر ناۋقاسقا شالدىققان سىنىپتاستارىنا بەردى، - دەپ حابارلايدى "قامشى" پورتالى "حابار" ارناسىنا سىلتەمە جاساپ. 

نازاربايەۆ زياتكەرلىك مەكتەبىنىڭ وقۋشىلارى مەكتەپپەن قوشتاسۋ كەشىنە جيناعان اقشانى قان اۋرۋىنا شالدىققان سىنىپتاسىنىڭ ەم-دومىنا اۋداردى.

نازاربايەۆ زياتكەرلىك مەكتەبىنىڭ 12 سىنىپ وقۋشىسى تەمىرلان مىرزاعالييەۆ بۇگىندە وڭتۇستىك كورەيادا ەمدەلىپ جاتىر. 

مەكتەپ ۇجىمى دا وقۋشىنىڭ تاعدىرىنا بەي-جاي قاراماي، ءوز ەرىكتەرىمەن ءبىر كۇندىك جالاقىسىن قايىرىمدىلىققا باعىتتادى. 

تەمىرلان مىرزاعالييەۆتى ەمدەۋ ءۇشىن وڭتۇستىككورەيالىق دارىگەرلەر: «160 مىڭ دوللار كولەمىندە اقشا قاجەت»، – دەگەن. ونى مامىردىڭ بىرىنە دەيىن جيناۋ كەرەك. وسىنى ەستىگەن سىنىپتاستارى ويلانباستان مەكتەپپەن قوشتاسۋ كەشىنە جينالعان ازىن-اۋلاق قارجىنى تەمىرلاننىڭ ەسەپ-شوتىنا اۋداردى.

ءجانيا ءابدىماش، تەمىرلاننىڭ سىنىپتاسى:

-سول ساتتە اقشا وتە تەز كەرەك بولدى. جانە مەكتەپ ءبىتىرۋ كەشىنە جينالعان اقشامىز دايىن بولعان. سوندىقتان ءبىز ونى تەز بەرە سالۋعا شەشتىك. تەمىرلان كەلگەندە ءبىز ءبارىمىز ءبىر جەرگە بارىپ، وتە جاقسى ۋاقىت وتكىزەمىز دەگەن سەنىمدەمىز. 

مۇعالىمدەر قاۋىمى دا بولاشاعىنان زور ءۇمىت كۇتىپ وتىرعان وقۋشىنى تاعدىردىڭ تالكەگىنە تاستاماي، ءبىر كۇندىك جالاقىلارىن تەمىرلاننىڭ ەسەپ-شوتىنا اۋداردى.

مەيرام جاكەنوۆ، فيزيكا-ماتەماتيكا باعىتىنداعى نازاربايەۆ زياتكەرلىك مەكتەبىنىڭ ديرەكتورى:

-100 مىڭ دوللاردان ارتىق جيناپ، ونىڭ بارلىعىن سول بالانىڭ شوتىنا جىبەرىپ ۇلگەردىك. ارينە تۇگەل مەكتەپتەرگە، اسىرەسە ءبىزدىڭ وسى باسقارۋشى ۇيىمىمىزعا ۇلكەن العىسىمىزدى ايتامىز.

بيىل مەكتەپ بىتىرەتىن تەمىرلانعا بۇگىندە اقش-تىڭ 3 جانە ۇلىبريتانيانىڭ 2 جوعارى وقۋ ورنىنان ۇسىنىس تۇسكەن. مەكتەپ باسشىلىعىنىڭ ايتۋىنشا، بۇل ۋنيۆەرسيتەتتەردىڭ ءبارى دە قازاق بالاسىنا دەمەۋ بولۋعا دايىن. مەكتەپتە تەمىرلانعا ساباق بەرەتىن شەتەلدىك مۇعالىمدەر ونىڭ العىر وقۋشى ەكەنىن ايتادى.

دجون زەنماني، مەكتەپ ديرەكتورىنىڭ ورىنباسارى:

-كوپتەگەن مۇعالىمدەر تەمىرلاندى بۇرىننان تانيدى. وسىنداي اۋىر جاعدايدى ەستىگەن كەزدە ولار يگى باستاما كوتەرىپ، قول ۇشىن بەرۋگە نيەتتى ەكەندىكتەرىن جەتكىزدى. ءبارىمىز بىردەن قولداۋ كورسەتىپ، مۇمكىندىگىمىزشە ەم-دومعا قارجى جينادىق. تەز ساۋىعىپ كەتسە ەكەن.

سەۋل قالاسىندا ەم الىپ جاتقان تەمىرلان مەكتەبىنىڭ بۇل قولداۋىن بىلەدى. سوندىقتان ارنايى سالەمدەمە جولداپ، ۇلكەن العىسىن بىلدىرگەن. ال مىناۋ ونىڭ وتكەن جىلدىڭ كۇزىندە تەلەارناعا بەرگەن سۇحباتى.

تەمىرلان مىرزاعالييەۆ، نازاربايەۆ زياتكەرلىك مەكتەبىنىڭ وقۋشىسى:

-مەن نازاربايەۆ ۋنيۆەرسيتەتىنە نەمەسە شەتەلدىڭ ءبىر جوعارى وقۋ ورنىنا تۇسكىم كەلەدى. ينجەنەر ماماندىعىن تاڭدايتىن شىعارمىن. مەكتەپتە مەنى فيزيكا مەن حيميا پاندەرى قىزىقتىرادى. 

سىنىپتاستارى قاجەتتى سومانى جيناۋ ءۇشىن قايىرىمدىلىق شارالارىن ءجيى وتكىزىپ، ودان تۇسكەن قارجىنى تەمىرلاننىڭ تۋىستارىنا جەتكىزۋدە. الداعى كۇندەرى استاناداعى ساۋدا ورىندارىنىڭ بىرىندە وقۋشىلار كونسەرت بەرىپ، ارنايى كورمە وتكىزۋدى كوزدەپ وتىر. بۇگىندە بۇل شاراعا بالالار جاپپاي دايىندالۋدا. «ەڭ باستىسى، تەمىرلان تەز ساۋىعىپ، ورتامىزعا ورالسا ەكەن»، – دەيدى جاناشىر دوستارى.