قارىز تولەنبەسە، كارىز قۇلىپتالادى. الماتىدا كوممۋنالدىق مەكەمە قارىزى قوردالانعان ابونەنتتەردىڭ كارىز قۇبىرىن بىتەپ جاتىر، - دەپ حابارلايدى «قامشى» پورتالى «الماتى» تەلەارناسىنا سىلتەمە جاساپ.

دارەتحانا مەن جۋىندى قالدىق سۋدان شىققان جاعىمسىز يىستەن قۇتىلۋدىڭ جالعىز جولى - كوممۋنالدىق تولەمدەردى ۋاقىتىلى جاساۋ. ءبىراق قولدانعان قىزمەتتىڭ اقىسىن قايتارعىسى كەلمەيتىندەر سانى ازايار ەمەس. 

بۇرىن ءبىر بورىشكەر ءۇشىن بۇكىل ءۇيدىڭ سۋ جۇيەسى توقتاتىلمايتىنىن بىلگەن تۇتىنۋشى قارىزىن تولەمەي جۇرە بەرەتىن. كوممۋنالدىق قىزمەت ماماندارى ەندى بەرەشەگى بارلاردىڭ سوڭىنان جۇگىرمەيدى. قارىزدى قايتارتۋدىڭ ءتيىمدى جولى - بورىشكەر پاتەرىن ارنايى قۇرىلعىمەن ءدال تاۋىپ، تىعىنداپ تاستاۋ.

«بىتەۋىشتى سالىپ، قۇبىرمەن تۇسىرەمىز. 12 پاتەر، 4 قاباتتا ورنالاسقان. مونيتور ارقىلى قاباتتى كورىپ وتىرامىز»،- دەدى  سلەسار ماۋلەن انداسوۆ.

قارىزى بار پاتەردىڭ دارەتحانا نەمەسە وزگە دە لاس سۋ اعاتىن قۇبىرىن تىعىنداۋ قيىن ەمەس. شاعىن كامەرامەن قاراپ، قۇبىر جولىن بىتەۋ ارى كەتكەندە 20 مينۋتتىڭ جۇمىسى. ول ءۇشىن پاتەرگە كىرۋدىڭ دە قاجەتى جوق. شاتىردىڭ ۇستىنە شىعۋ جەتكىلىكتى. ءبىر تۇتىنۋشىنىڭ قۇبىرى بىتەلگەندىكتەن، تولەمدى دەر كەزىندە وتەيتىن ءۇيدىڭ وزگە تۇرعىندارى زارداپ شەكپەيدى.

«قۇبىرى بىتەلگەن 10 پاتەردىڭ توعىزى سول كۇنى بىردەن حابارلاسىپ، جىلدار بويى جينالعان قارىزىن جىلدام تولەيدى. ءبىراق بىزدە قۇبىردى قايتا قوسۋ تەك جۇما كۇنى عانا جۇرگىزىلەدى. سوندىقتان باسقا كۇندەرى ورتالىقتان اجىراتىلعان پاتەردىڭ تۇرعىندارىنا جۇماعا دەيىن شىداۋعا تۋرا كەلەدى»،- دەدى «توسپا سۋ» مكك ىشكى باقىلاۋ قىزمەتىنىڭ جەتەكشىسى سەرىك شاگىروۆ.

الماتىدا قالدىق سۋدىڭ ءبىر تەكشە مەترى ءۇشىن تۇتىنۋشىلار بار بولعانى 28 تەڭگە تولەيدى. ورتاشا ەسەپپەن ءار پاتەر ايىنا 150-200 تەڭگەدەن تولەۋگە ءتيىس. ءبىراق تۇتىنۋشىلاردىڭ بارلىعى بىردەي جاۋاپتى ەمەس. سوندىقتان قوردالانعان قارىز سوماسى مىڭداعان تەڭگەگە جەتىپ جاتىر. بۇگىندە كوپقاباتتى ۇيلەر تۇرعىندارىنىڭ تازا سۋ ءۇشىن بەرەشەگى -72 ميلليون تەڭگەگە جەتسە، كارىز قىزمەتى ءۇشىن  45 ميلليون تەڭگە بەرەشەك.

«ءبىر رەت وشىرسەك، ول اقىسىز. ال ەكىنشى رەت وشىرسەك، قايتا قوسۋ قۇنى جيىرما مىڭ تەڭگەگە دەيىن بارادى. سوندىقتان ايىنا شىعاتىن 150 تەڭگەگە بولا جيىرما مىڭ تەڭگە تولەۋدىڭ قاجەتى جوق. وعان جەتكىزبەي اي سايىن كوممۋنالدىق تولەمدەردى جاساپ تۇرىڭىزدار دەر ەدىم»،- دەدى «الماتى سۋ حولدينگى» مكك قوعاممەن بايلانىس ءبولىمىنىڭ مامانى اقبوتا جىلىسوۆا.

ءقازىر قالا كولەمىندە ءۇش بريگادا قارىزى بارلاردىڭ كارىز قۇبىرىن بىتەۋمەن اينالىسىپ جاتىر. ءدال وسىنداي تاسىلمەن بىرنەشە كوممەرسيالىق مەكەمەلەر دە وشىرىلەدى. سوڭعى ۋاقىتتا 875 پاتەردىڭ قۇبىرى تىعىندالسا، قولقانى قابار يىسكە شىداماعان 613 ءۇيدىڭ يەسى بەرەشەكتەرىن بىردەن تولەگەن.