ارمەنيانىڭ شيراك وبلىسى اريچ اۋىلىندا قازاقستان پرەزيدەنتى نۇرسۇلتان نازاربايەۆتىڭ اتىنا بەرىلگەن ورتالىق كوشەنىڭ اتاۋى وزگەرتىلەتىن بولدى دەپ حابارلايدى NUR.KZ پورتالى novostink.ru سايتىنا سىلتەمە جاساپ.

اۋىلدىڭ اقساقالدار كەڭەسى 14 ءساۋىر كۇنى ءبىراۋىزدان وسىنداي شەشىم قابىلداعان دەپ مالىمدەدى اۋىلدىق اكىمشىلىك باسشىسى روالند نازارەتيان.

اقاساقالدار كوشەنى «ارساح» دەپ اتاۋدى ۇسىنسا، جەرگىلىكتى شىركەۋدىڭ ءدىندارلارى وعان گريگور ءلۋساۆوريچتىڭ ەسىمىن بەرۋدى قالايدى.

«الداعى اقساقالدار كەڭەسىنىڭ وتىرىسىندا سوڭعى شەشىم شىعارىلىپ، كوشە اتاۋى وزگەرتىلەدى»، — دەيدى نازارەتيان.

ونىڭ ايتۋىنشا، تۇرعىندار ءبىر جىل بۇرىن نازاربايەۆ ارمەنيانىڭ ەاەو قاتارىنا قوسىلۋىن قولداماعان كەزدە كوشەنىڭ اتاۋىن اۋىستىرۋدى ۇيعارعان. الايدا نازارەتيانعا بۇلاي جاساۋعا "جوعارىداعىلار" كەدەرگى كەلتىرگەن-دى.

اۋىل تۇرعىندارى سونداي-اق قازاقستان پرەزيدەنتىنىڭ وتىنىشىمەن ەريەۆاندا ەاەو پرەمەر-مينيسترلەرىنىڭ ءسامميتى بولماي قالعانىنا رەنجۋلى. نازاربايەۆتىڭ تۇركيا پرەزيدەنتى ەردوعاندى قۇشاقتاعانىنان كەيىن تۇرعىنداردىڭ شىدامى تىپتەن تاۋسىلىپ، ولار كوشەدەن پرەزيدەنتتىڭ اتاۋى ىلىنگەن تاقتايدى جۇلۋعا كىرىسكەن.

كوشە 10 جىلدان بەرى نازاربايەۆتىڭ اتىمەن اتالىپ كەلەدى. ونى قازاقستان پرەزيدەنتىنىڭ قۇرمەتىنە قويۋ ۇسىنىسىن ۇلتتىق جيىننىڭ بۇرىنعى دەپۋتاتى محيتار ۆاراكيان جاساعان. ايتا كەتەرلىگى، سول كەزدە ۆاراكياننىڭ اعاسى نازاربايەۆتىڭ كەڭەسشىسى بولعان.

اريچ اۋىلىنىڭ سول كەزدەگى باسشىسى رولاند نازارەتيان بۇل باستامانىڭ سەبەپتەرى جان-جاقتى قارالعانىن العا تارتقان ەدى.

«اريچ 1400-1947 جىلدار ارالىعىندا كپچاك دەپ اتالدى. ال كپچاك قازاقستاننىڭ كونە تايپالارىمەن بايلانىستى بولعاندىقتان، ۆاراكياننىڭ باستاماسىمەن كوشەنى نازاربايەۆ دەپ اتاۋ شەشىمى قابىلداندى. ءبىز قازاقستاندى دوسىمىز دەپ بىلەمىز، ول ءبىزدىڭ رەسپۋبليكامىزبەن ەۋرازيالىق وداق اياسىندا ىنتاماقتاستىق قارىم-قاتىناستا. بۇل اتاۋدى وسىلاي وزگەرتۋگە تولىق نەگىز بەرەدى»، — دەپ تۇسىندىرگەن ەدى نازارەتيان.

اتالمىش اۋىل نازاربايەۆتىڭ ەسىمىمەن شەكتەلمەيدى. اۋىلدىڭ كىتاپحاناسىندا نازاربايەۆتىڭ ۇلكەن پورترەتى مەن ەلىمىزدىڭ ادەبي كىتاپتارى قويىلعان قازاقستان بۇرىشى بار. بۇل بۇرىشتى 2011 جىلى قازاقستان ەلشىلىگى قويعان.

ەلشىلىك كىتاپحاناعا جيھاز، ۇستەل، كىتاپتار، كارتينالار جانە ۇلتتىق كيىمدەردى تارتۋ ەتكەن. نازاربايەۆقا كوشە اتاۋى بەرىلگەنىنەن قازاقستان پرەزيدەنتى قانشالىقتى حاباردار ەكەنىن اۋىل تۇرعىندارى ءالى كۇنگە دەيىن بىلمەيدى.