قارجىلىق داعدارىس پاۆلودار وبلىسىنداعى «ءسپيد-تىڭ» الدىن الۋ ورتالىعىن مۇشەقاپ الۋعا بولىنەتىن قاراجات كولەمىن قىسقارتۋعا ماجبۇرلەپ وتىر، - دەپ حابارلايدى «قامشى» پورتالى ratel.kz – كە سىلتەمە جاساپ.

سايتتىڭ جازۋىنشا، وبلىستىق «سپيد-كە» قارسى ورتالىق بيىل مەملەكەتتىك ساتىپ الۋ پورتالى ارقىلى جالپى قۇنى 9 999 982 تەڭگەگە مۇشەقاپتار ساتىپ الماقشى ەكەن. بۇل قاراجاتقا ورتالىق ءار داناسىن 82 تەڭگەدەن 121951 مۇشەقاپ ساتىپ الۋدى كوزدەپ وتىر.

مۇشەقاپتار جىلداعى ءداستۇر بويىنشا سەكس-وندىرىستىڭ بەلسەندى مۇشەلەرىنە (جەزوكشەلەرگە – رەد.)، قىزتەكەلەر مەن ەركەكقىزدارعا، بۇرىن سوتتالعان ازاماتتار مەن ناشاقورلارعا تەگىن تاراتىلماق.

وبلىستىق جۇقپالى اۋرۋعا قارسى ورتالىق ماماندارى سونداي-اق، قارجى تاپشىلىعىنا بايلانىستى، بيىل مۇشە قاپ ساتىپ الۋعا بولىنگەن قاراجاتتىڭ ءبىرشاما قىسقارعانىن ايتقان. مىسالى، 2015 جىلى بۇل ماقساتقا 15،5 ميلليون تەڭگە ءبولىنىپ، ول قاراجاتتىڭ 10 ميلليونىنا قۇنى 50 تەڭگە بولاتىن، قالعان 5،5 ميلليون تەڭگەسىنە 20 تەڭگەلىك مۇشەقاپتار ساتىلىپ الىنعان كورىنەدى.

سايت ماماندار سەكس-ونەركاسىپتىڭ ءاربىر جۇمىسشىسىنا ءبىر جىلعا 1060 مۇشەقاپ قاجەت ەكەنىن دە ەسەپتەپ قويعانىن جازىپ وتىر. ستاتيستيكالىق مالىمەتتەرگە ساي، وبلىستا بۇگىندە وسىنداي 700-دەن استام ادام بار كورىنەدى. جوعارىداعى ەسەپكە جۇگىنسەك، ولاردىڭ «سۇرانىسىن» قاناعاتتاندىرۋ ءۇشىن 750 مىڭ مۇشەقاپ ساتىلىپ الىنۋى قاجەت. ال، مۇنداي مولشەردى وبلىس بيۋدجەتى كوتەرە المايتىندىقتان، وڭىردەگى جەزوكشەلەردىڭ ءبىرشاماسى تەگىن مۇشەقاپتان قاعىلعالى وتىرعان سياقتى.