ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى  26 ساۋىردە تۇركيانىڭ كونيا قالاسىندا بولاتىن "مىڭ ءبىر تىنىس جانە ءبىر داۋىس" اتتى حالىقارالىق تەاترلار فەستيۆالىنە اتتاندى، - دەپ حابارلايدى «قامشى» پورتالى تەاتردىڭ باسپا ءسوز قىزمەتىنە سىلتەمە جاساپ.

تۇركيانىڭ ءتورت تەاترىنان بولەك، ءازىربايجان، مولداۆا، بولگاريا، ماكەدونيا، كيپر، گرۋزيا، جۇڭگو مەملەكەتتەرىنىڭ ونەر وشاقتارى قاتىساتىن فەستيۆالگە قازاقستاننىڭ اتىنان ع. مۇسىرەپوۆ اتىنداعى تەاتر ۇجىمى جولداما العان بولاتىن.

بيىل توعىزىنشى رەت ۇيىمداستىرىلىپ وتىرعان حالىقارالىق فەستيۆالگە تەاتر ۇجىمى گ.حۋگايەۆتىڭ "قارا شەكپەن" قويىلىمىن دايىنداعان. قويۋشى رەجيسسەرى - قازاقستاننىڭ ەڭبەك سىڭىرگەن قايراتكەرى اسحات ماەميروۆ. رولدەردە وينايتىندار:  دانيار بازارقۇلوۆ، اسەت ەسجان، ەدىل رامازانوۆ، جانار ماقاشيەۆا، ءسانيا ەرزات، دارحان سۇلەيمەنوۆ، ەرلان كارىبايەۆ، گۇلباحرام بايبوسىنوۆا، ەربول سادىربايەۆ، ەربول يدريسوۆ جانە  گاۋحار ساعىنعالييەۆا، تولقىن نۇربەكوۆا، قۋانىش تۇردالين، ءمولدىر قونىس قىزى، دينارا شىمىربايەۆا، ەلدار وتاربايەۆ.

"جەر بەتىن مەكەندەيتىن ون سەگىز مىڭ عالامنىڭ ىشىندەگى ەڭ قۇدىرەتتىسى دە، ەڭ ادەمىسى دە - ادام"... ال، ءبىز، ءدال وسىنداي "دارەجەگە" راسىمەن، لايىقپىز با؟!

كەز-كەلگەنىمىزدىڭ بويىمىزدا بار ءوزىمشىل قاسيەتتەر باسىم ءتۇسىپ، جان ازىعىنان ماقۇرىم قالعان ادامداي ادامدىق قاسيەتىمىز جويىلىپ، كەيدە حايۋانعا اينالىپ بارا جاتقانىمىزدى ءوزىمىز دە بايقاماي جاتامىز...»
ءدال وسى ساۋالدارعا جاۋاپ ىزدەيتىن "قارا شەكپەن" قويىلىمى - تۇركىتىلدەس حالىقتاردىڭ زور ىقىلاسىنا بولەنەدى دەگەن سەنىممەن، تەاتر ۇجىمىنا ساتتىلىك تىلەيمىز!»، - دەلىنگەن باسپا ءسوز قىزمەتى تاراتقان حابارلامادا.