«احمەتوۆ ءىسى» بويىنشا ءىستى بولعان قاراعاندى وبلىسىنىڭ اكىمى قاراعاندى وبلىستىق سوتىنا مەرزىمىنەن بۇرىن بوساتۋدى سۇراپ جازعان ءوتىنىشىن قايتارىپ الدى، - دەپ حابارلايدى Qamshy.kz قاراعاندى وبلىستىق سوتىنىڭ باسپا ءسوز قىزمەتىنە سىلتەمە جاساپ.

باۋىرجان ابدىشيەۆتىڭ ءوتىنىشىن سوت 20 ءساۋىر كۇنى قاراۋ كەرەك بولعان. الايدا، ءوتىنىش قارالار ۋاقىتتان ءبىر كۇن بۇرىن، ياعني، 19 ءساۋىر كۇنى ب. ابدىشيەۆ ءوز ءوتىنىشىن قاراۋسىز قالدىرۋدى سۇراپ، قايتادان ءوتىنىش جاساعان. ەكس-اكىمنىڭ بۇل ارەكەتىنىڭ سەبەپتەرى تۇسىنىكسىز بولىپ وتىر. ولاي دەيتىنىمىز، ب. ابدىشيەۆتىڭ شارتتى تۇردە مەرزىمىنەن بۇرىن بوستاندىققا شىعۋعا مۇمكىندىگى بار ەدى.

ەكس-اكىمنىڭ ءوتىنىشىن قاراعان سۋديا شۋجەنوۆ ونى وزگەرىسسىز قالدىرىپ، ءىستى قاراعاندى وبلىسى بويىنشا قىلمىستىق اتقارۋ جۇيەسى دەپارتامەنتىنىڭ اك-159/1 مەكەمەسىنە قايتارعان. 

10 ناۋرىز كۇنى اپەللياسيالىق سوت 5 جىلعا باس بوستاندىعىنان ايرىلعان ب. ابدىشيەۆتىڭ جازاسىن 3 جىلعا قىسقارتقان بولاتىن. تەرگەۋ كەزىندە جانە سوت پروسەسى بارىسىندا قاماۋدا بولعان ۋاقىتى جازا مەرزىمىنە قوسىلادى. ول قاماۋعا الىنعان 2014 جىلعى 27 قىركۇيەكتەن باستاپ بۇگىنگە دەيىن ءبىر جارىم جىل تەمىر توردىڭ ار جاعىندا وتىرعان بولاتىن.

الايدا، ب. ابدىشيەۆتىڭ بۇل ارەكەتى ونىڭ بولاشاقتا ءوزىن مەرزىمىنەن بۇرىن بوساتۋدى سۇراپ، قايتا ءوتىنىش بەرۋ مۇمكىندىگىن جوققا شىعارمايدى.