ەڭ الدىمەن كەلەر جىلى وتەدى دەپ قۇرىلىسى قىزۋ ءجۇرىپ جاتقان «ەكسپو-2017» نىسانىنداعى جۇمىسشىلارمەن كەزدەسۋ ۇيىمداستىرىلدى، - دەپ حابارلايدى Qamshy.kz 31-ارناعا سىلتەمە جاساپ.
ماقسات بىرەۋ - ەلىمىزدىڭ بارلىق ايماعىنان كەلگەن ازاماتتار اراسىنداعى ءدىني تاقىرىپتاعى كەلىسپەۋشىلىكتەرگە تۇسىنىكتەمە بەرۋ.
تولەبي وسپانوۆ، «نۇر استانا» مەشىتىنىڭ نايب يمامى:
- جاي عانا سالت-داستۇرلەردىڭ وزىندە كەلىسپەۋشىلىكتەردىڭ بولۋى زاڭدىلىق. بۇل وسى سىندى ءدىني تۇرعىدا دا ءارتۇرلى تۇسىنىك وسى الاڭعا كەلىپ جينالاتىنى ءسوزسىز. سوندىقتان وسى جەردە ءارتۇرلى دۇرىس ەمەس تۇسىنىكتەر باسقا كىسىلەردى ۋلاماس ءۇشىن بۇگىنگى شارا ءتۇسىندىرۋ ماقساتىندا ۇيىمداستىرىلىپ وتىر.
جيىندا ەلگە تانىمال ءدىنتانۋشىلاردان بولەك تاريحشىلار دا ءسوز الىپ، قازاق جەرىندەگى يسلام ءدىنىنىڭ وتكەنىن تاپتىشتەپ ءتۇسىندىرىپ بەردى. تەرىس اعىمداردىڭ جۇمىس ىستەۋ سيپاتتارى مەن ولاردىڭ قوعامعا كەلتىرەر زيانى دا ايتىلدى. ءداستۇرلى ەمەس ءدىني بىرلەستىكتەردىڭ كوبى لاڭكەستىك ۇيىمدارمەن بايلانىسى بار ەكەنىنە دە توقتالدى.
ەركىنبەك شوقايەۆ، اتىراۋ وبلىسى ءدىن ىستەرى باسقارماسىنىڭ باسشىسى:
- «يسلام مەملەكەتى» دەپ ءوزىن اتاپ وتىرعان ۇيىمنىڭ ىستەرىن، ولاردىڭ قىلمىستارىن اشكەرەلەپ، بۇقارالىق اقپارات قۇرالدارى ارقىلى، وسىنداي جيىندار ارقىلى جانە ءاربىر وتباسى ءوزىنىڭ شاڭىراعىندا ايتىپ، ءاربىر ازامات ەرمەيتىن بولسا ولاردىڭ تەرىس باعىتتاعى ۋاعىزدارىنا، وندا ءبىز قوعام رەتىندە ىنتىماعىمىزدى، تىنىشتىعىمىزدى ساقتاپ قالامىز.
ۇيىمداستىرۋشىلار وسىنداي جيىنعا قاتىسقانداردىڭ ىشىندە تەرىس اعىم جەتەگىندە جۇرگەندەر بولسا، ءدىنتانۋشىلاردىڭ ايتقاندارىنان ساباق الىپ، ءداستۇرلى دىنگە ورالۋى مۇمكىن دەيدى. ال وزگەلەرگە الدىن الا ەسكەرتۋ ارقىلى يممۋنيتەت قالىپتاستىرۋ كوزدەلگەن. ەلوردا بيلىگى بۇل باعىتتاعى جۇمىستارىن الداعى ۋاقىتتا دا جۇيەلى تۇردە جالعاستىرا بەرمەك.
