قوستاناي قالاسىنىڭ تۇرعىنى مارفۋعا سەلتەتكەنوۆا بيىل 114 جاسقا تولدى. قاريا، ءالى كۇنگە دەيىن كىتاپ وقىپ، ءان سالادى، - دەپ حابارلايدى Qamshy.kz  24.kz. ارناسىنا سىلتەمە جاساپ.

تىلدا ەڭبەك ەتكەن انا قازاق ەلىنىڭ بىرنەشە مەرەيتويلىق توسبەلگىلەرىن كەۋدەسىنە تاققان. مارفۋعا اجە ءومىر بويى قولىنان قاسيەتتى كىتاپتارىن تاستاعان ەمەس. جاسىندا مەدرەسەدە ءدىني ساۋات اشقان ول انا تىلىمەن قاتار ورىس، اراب، باشقۇرت، تاتار تىلدەرىن جەتىك بىلەدى. كەيۋانا ءان دە شىرقايدى. مارفۋعا اجە تاعدىر تاۋقىمەتىن كوپ تارتقان. 1902 جىلى رەسەيدە تۋىپ، كەيىن زامانا جەلىمەن مەڭدىقارا اۋدانىنا كەلەدى. اشتىق، سوعىستىڭ دا كۋاسى بولعان انا تىلدا ەڭبەك ەتكەن. العاشقى قوساعىنان ەرتە ايىرىلىپ، شيەتتەي ءتورت بالاسىمەن ەكىنشى رەت تۇرمىس قۇرعان. ودان التى بالا ءسۇيىپ، ەكى بالانى باۋىرىنا باسقان. اۋىر جىلدارى اۋىلدا كولحوز جۇمىسىنا جەگىلىپ، كيىم تىگىپ، الاشا توقىعان.

"نان ءپىسىردىم. جۇمىس ىستەپ جۇرگەن ادامداردىڭ كيىمىن دە جۋدىم. سول اۋىلدىڭ ۋدارنيگى مەن بولدىم. قانداي جۇمىس بەرسە ءبارىن ىستەدىم"، - دەيدى تىل ارداگەرى مارفۋعا سەلتەتكەنوۆا.

"بالىق اۋلاۋعا، قۇس اتۋعا كەلگەن كىسىلەردىڭ ءبارى بىزدىكىندە بولاتىن. بيە ۇستايتىن دا ءبىزدىڭ ءۇي بولعان. كورشىلەر وسى كۇنگە دەيىن «اجە، اجە» دەپ بىرەۋىمىزبەن دە ءبىر ۇرسىسىپ، نە جامان ءسوز ايتىپ كورگەن ەمەس، ءبارىمىزدى دە قارسى الىپ وتىرادى. اللانىڭ جولىندا جۇرگەسىن، ىلعي جاقسىلىق جاساعاسىن دا ۇزاق جاساعان شىعار دەپ ويلايمىن"، - دەيدى 69 جاستاعى قىزى جىبەك قۇرمانوۆا.

114 جاستاعى انا قوعام ومىرىنەن شەت قالماق ەمەس. اجەي بيىلعى سايلاۋدا ساياسي تاڭداۋىن جاساپ، ەل ەرتەڭى ءۇشىن داۋىس بەرگەن. ءقازىر ول تامىرىن تەرەڭ جايعان بايتەرەك سىندى. بەس بالاسىنىڭ كوزى ءتىرى. نەمەرە، شوبەرە، شوپشەگى الپىستان اسادى.

 «تابيعي، ۇلتتىق تاعام جانە سابىر، ەڭبەك، مەيىرىم مەن تازالىق عاسىردان ارتىق عۇمىر كەشۋىمىنىڭ باستى سىرى» - دەيدى قەيۋانا.

قازىرگى ۋاقىتتا ۇزاق جاساعان اجەيدىڭ ۇرپاعىنىڭ ءبىر شەتى سوناۋ دۋبايدا تۇرىپ جاتىر. "اقتاۋدا، الماتىدا، شىمكەنتتە، چەليابىدە، استانادا، وسكەمەن، بار جەردە تۇرىپ جاتىر، اعايىندار كوپ"، - دەيدى كەيۋانانىڭ قىزى.