پەتروپاۆلدىڭ ورتالىق بازارىنداعى ساۋداگەرلەردەن «ورىس الەمىن» قارجىلاندىرۋ ءۇشىن اقشا جينالعان، - دەپ حابارلايدى Qamshy.kz.
بۇل تۋرالى ساۋداگەرلەر سولتۇستىك قازاقستان وبلىستىق كاسىپكەرلەر مەن تۇتىنۋشىلار قۇقىعىن قورعاۋ قاۋىمداستىعى مەن قالالىق مەملەكەتتىك مۇلىك دەپارتامەنتى سىندى ورگاندارعا شاعىمدانعاننان سوڭ بارىپ قانا بەلگىلى بولىپ وتىر.
وبلىستىق كاسىپكەرلەر مەن تۇتىنۋشىلار قۇقىعىن قورعاۋ قاۋىمداستىعىنىڭ ءتوراعاسى نادەجدا دۋبوۆانىڭ ايتۋىنشا، وعان ورتالىق بازارداعى ساۋداگەرلەر شاعىمدانعان. ولارمەن كەزدەسۋگە بارعان ءتوراعانى بازار كۇزەتشىلەرى كىرگىزبەي، توسقاۋىل جاساعان. ن. دۋبوۆا وسى كەلەڭسىزدىك تۋرالى قالالىق پروكۋراتۋراعا ارىز دايىنداپ قويىپتى. الايدا، قاۋىمداستىق باسشىسىنىڭ ايتۋىنشا، كۇزەتشىلەرمەن بولعان كيكىلجىڭ بۇل داۋدىڭ باسى عانا كورىنەدى.
«بازارداعى اشىق ساۋدا قاتارلارىن بازار اكىمشىلىگى جابىق پاۆيلونداوعا الماستىراتىن كەزدە ساۋداگەرلەردەن 600 مىڭ تەڭگەدەن 2 ميلليون تەڭگەگە دەيىن اقشا جينالعان. الايدا، ەشكىمگە ول پاۆيلونداردىڭ مەنشىك قۇقىعىن راستايتىن قۇجاتتار بەرىلمەگەن. قاۋىمداستىققا دا وسى ماسەلەگە بايلانىستى شاعىم ءتۇستى. 23 ءساۋىر كۇنى ساۋداگەرلەر مەنى وسى ماسەلەنى اقىلداسۋعا شاقىرعان بولاتىن»، - دەيدى ول.
ن. دۋبوۆانىڭ ايتۋىنشا بازار ءبىر كەزدەرى قازاقستانداعى كازاك ۇيىمدارىنىڭ جەتەكشىسى يۋريي زاحاروۆقا تيەسىلى بولعان. ءبىراق، كەيىن ساۋدا ورنى بىرنەشە ادامنىڭ اتىنا جازىلىپ، ونىڭ ەسىمى ۇمىت بولعان. ءقازىر بازار ديرەكتورى ەدىل جاليموۆ دەگەن ازامات بولعانىمەن، بۋتيكتەردى جالعا الۋشىلار ماكسيم ۆاگنەر دەگەن جەكە كاسىپكەرمەن كەلىسىم-شارتقا وتىرعان كورىنەدى.
2015 جىلدىڭ اقپانىندا قالا باسشىلىعى مەن پروكۋراتۋرا ماماندارى بازار اكىمشىلىگىنە ساۋداگەرلەرگە بۋتيكتەرگە مەنشىك قۇقىعىن بەرەتىن قۇجاتتاردى ۇسىنۋدى مىندەتتەگەن. الايدا، از ۋاقىت وتكەن سوڭ جالعا الۋ قۇقىعىن بەرەتىن قۇجات تاپسىرىلعان.
بۇل تۇسىنىكسىز قۇجاتقا ريزا بولماعان كاسىپكەرلەر مەملەكەتتىك كىرىس دەپارتامەنتىنە شاعىمدانىپ، وندا وزدەرى بازار اكىمشىلىگىنە قىرۋار قارجى تولەپ، الايدا ەشقانداي راستاۋشى قۇجاتقا قول جەتكىزە الماي وتىرعاندىقتارىن ايتقان. وسى جەردە بىرەۋلەردىڭ اقشانى بازار اكىمشىلىگىنە بەرگەنى، ەندى بىرەۋلەردىڭ اكىمشىلىك ۇسىنعان رەكۆيزيتتەر بويىنشا بانكتىك اۋدارىم جاساعانى بەلگىلى بولادى. وسى تۇستا بازارداعى ساۋداگەرلەردەن «ورىس الەمىن» قولداۋ ءۇشىن قارجى جينالعانى انىقتالىپ وتىر.
ساۋداگەر اينۇر الىبەكوۆا كىرىس دەپارتامەنتىنە جازعان حاتىندا 2014 جىلى ءساۋىر ايىندا 1 760 مىڭ تەڭگەگە بۋتيك العانىن، ونىڭ اقشاسىن «رۋسسكيي مير» جشس-نىڭ اتىنا كورسەتىلگەن ەسەپ-شوتقا «قايتارىمسىز ماتەريالدىق كومەك» دەگەن نەگىزدەمەمەن اۋدارعانىن، الايدا، قولىنا بۋتيككە مەنشىك قۇقىعىن بەرەتىن ەشقانداي قۇجات بەرىلمەگەنىن جازعان.
ال، كاسىپكەرلەر قۇقىعىن قورعاۋشى ۇيىم وكىلدەرى سولتۇستىك قازاقستان وبلىسى اۋماعىندا مۇنداي ءجشس-نىڭ تىركەلمەگەنىن انىقتاعان. كاسىپكەرلەر بولسا، ءوز قولدارىمەن قىرۋار قارجىنى «رۋسسكيي مير» ۇيىمىنىڭ شوتىنا قايتارىمسىز كومەك دەگەن تولەم تاپسىرىسىمەن اۋدارىپ كەلگەن...
دارحان مۇقانتەگى
