قالالىق جەرلەردەگى ەڭبەك نارىعى 2015 جىلى كەڭەيگەنى بايقالادى – وتكەن جىلى قالالىق جەرلەردەگى جالدانبالى جۇمىسشىلار سانى 155 مىڭ ادامعا وسكەن. بۇل 2011 جىلدان بەرگى ۋاقىتتاعى ەڭ جوعارعى كورسەتكىش، - دەپ حابارلايدى Qamshy.kz ranking.kz-كە سىلتەمە جاساپ.

ەڭبەك نارىعىنىڭ ءوسۋى استانا مەن الماتى قالاسىندا بايقالادى، مۇندا جۇمىس ىستەيتىن حالىق سانى 113 مىڭ ادامعا ارتقان. بۇل – رەسپۋبليكا بويىنشا ءوسىمنىڭ 73 پايىزىنا تەڭ.

الماتىداعى جۇمىسپەن قامتۋ نەگىزىنەن ساۋدا سەكتورىنا تيەسىلى – بۇل سالا قالا ەكونوميكاسىنداعى جۇمىسپەن قامتۋ ءوسىمىنىڭ 50 پايىزىن قۇراپ وتىر.

ال، استانا قالاسىندا ەڭبەك نارىعىنىڭ كەڭەيۋى قۇرىلىس سەكتورىندا بايقالادى. بۇل سالا استانا ەكونوميكاسىنداعى جۇمىسپەن قامتۋ ءوسىمىنىڭ 20 پايىزىن قۇراپ وتىر.

استاناداعى قۇرىلىس سەكتورى ەكسپو-2017 جوباسىن جۇزەگە اسىرۋ ارقاسىندا وسىمگە يە بولۋدا. استانالىق ەڭبەك نارىعىندا جۇمىسپەن قامتۋ نارىعىنىڭ كۇرت ءوسۋى 2011 جىلى، استانانىڭ حالىقارالىق كورمە وتەتىن ورىن رەتىندە جاريالانعانىنان كەيىن باستالدى.

بۇگىنگى تاڭدا ەكسپو-2017 جوباسى جاڭا نىساندار قۇرىلىسىندا 8،8 مىڭ جۇمىس ورنىن اشىپ، استاناداعى قۇرىلىس سەكتورىنا تيەسىلى ەڭبەك نارىعىنىڭ 30 پايىزىن قۇراپ وتىر.

سالىستىرۋ ءۇشىن ايتار بولساق، 2015-2019 جىلدارعا ارنالعان مەملەكەتتىك يندۋستريالىق-يننوۆاسيالىق دامۋ باعدارلاماسىن (ييدمب) جۇزەگە اسىرۋ بارىسىندا وڭدەۋ ونەركاسىبى سالاسىندا رەسپۋبليكا بويىنشا 4،5 مىڭ جاڭا جۇمىس ورنى اشىلعان.

ەكسپو-2017 نىساندارىنىڭ قۇرىلىسىنا باس مەردىگەر رەتىندە 254 وتاندىق تاۋار ءوندىرۋشى تارتىلىپ، جالپى قۇنى 33،703 ملرد تەڭگە بولاتىن كەلىسىم-شارتتار جاسالعان. ونىڭ ىشىندە استانا قالاسى بويىنشا (196 كاسىپورىن) – 21،6 ملرد. تەڭگە، سقو بويىنشا (1 كاسىپورىن) – 1،1 ملرد تەڭگە، قاراعاندى وبلىسى بويىنشا (20 كاسىپورىن) – 8،3 ملرد تەڭگە، پاۆلودار وبلىسى بويىنشا (4 كاسىپورىن) – 0،7 ملرد تەڭگە، وقو بويىنشا (2 كاسىپورىن) – 0،02 ملرد تەڭگە، شقو بويىنشا (1 كاسىپورىن) – 0،1 ملرد تەڭگە، اقمولا وبلىسى بويىنشا (3 كاسىپورىن) – 0،2 ملرد تەڭگە، جامبىل وبلىسى بويىنشا (2 كاسىپورىن) – 0،1 ملرد تەڭگەنىڭ كەلىسىم شارتىنا قول قويلىعان.