نۇرسۇلتان نازاربايەۆ بۇگىن ءوزى تۋرالى تۇسىرىلگەن «ەلباسى جولى» كينوەپوپەياسىنىڭ قورىتىندى ءبولىمى «جۇلدىزدار توعىسقاندا» ءفيلمىنىڭ تۇساۋكەسەرىنە قاتىستى، - دەپ حابارلايدى Qamshy.kz.

ەلباسى ءفيلمنىڭ پرەمەراسىن كورۋ ءۇشىن «قازاقستان» ورتالىق كينوزالىنا باردى. فيلم مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلگەن. رەجيسسەرى ءارى سەناريسى – رف مەملەكەتتىك سىيلىعىنىڭ يەگەرى، رەسەيدىڭ حالىق ءارتىسى سەرگەي سنەجكين.

پرەزيدەنتپەن بىرگە پرەمەرانى پارلامەنت دەپۋتاتتارى، پرەمەر-مينيستر كارىم ءماسىموۆ پەن ۆيسە-پرەمەر داريعا نازاربايەۆا باستاعان ۇكىمەت مۇشەلەرى دە تاماشالادى.

«بۇل مەن ءۇشىن دە، مەنىڭ ارىپتەستەرىم ءۇشىن دە ەرەكشە تاجىريبە بولدى. الەمدە كوزى ءتىرى ادام تۋرالى كوركەم فيلم تۇسىرگەن باسقا رەجيسسەر جوق. مۇنىڭ بارلىعىن «كەرەمەت ادام تۋرالى حيكايات» دەۋگە بولادى»، - دەيدى كارتينا رەجيسسەرى سەرگەي سنەجكين.

ءفيلمنىڭ سيۋجەتتىك جەلىسى بويىنشا، اعىلشىن جازۋشىسى دجەرەمي ۆيلسون ن. نازاربايەۆتىڭ ءومىربايانىن جازۋ ءۇشىن ونىمەن كەزدەسەدى. الايدا، جوسپارلانعان سۇحبات مەملەكەتتىڭ قالىپتاسۋى تۋرالى اڭگىمەگە ۇلاسادى. ۆيلسون 1950،1989،1986،1991 جىلدارعا ساپار شەگەدى. جۋرناليست نۇرسۇلتان نازاربايەۆ ەسكە الاتىن وقيعالاردىڭ كۋاگەرى ءھام قاتىسۋشىسىنا اينالادى.

ەپوپەيانىڭ سوڭعى قورىتىندى بولىمىندە ەلباسىنىڭ ءرولىن اكتەر بەرىك ايتجانوۆ سومدايدى. ونىڭ الدىنداعى بولىمدەردە پرەزيدەنت ءرولىن سومداۋ باقىتى اكتەر نۇرلان ءالىمجانوۆقا بۇيىرعان ەدى. پرەزيدەنتتىڭ قىزدارىنىڭ رولىندە قارلىعاش مۇحامەدجانوۆا مەن دينارا باقتىبايەۆا وينايدى.

جالپى، «جۇلدىزدار توعىسقاندا» فيلمىنە مەملەكەتتەن 1،2 ميلليارد تەڭگە قاراجات بولىنگەن. بۇدان بولەك كارتينانى تۇسىرۋگە دەمەۋشىلەردىڭ دە قاراجاتى تارتىلعان.

«ەلباسى جولى» كينوەپوەياسىنا بۇرىن تۇسىرىلگەن «بالالىق شاعىمنىڭ اسپانى»، «وتتى وزەن»، «تەمىر تاۋ» جانە «تىعىرىقتان جول تاپقان» فيلمدەرى ەنگەن ەدى.